Svavar Gestsson:
Herra foreti. Ég vil þakka hv. þm. Össuri Skarphéðinssyni fyrir að bera þessa fsp. fram og bæta því við að ég tel að það sé nauðsynlegt í umræðum um þessi mál í tilefni af flutningi grunnskólans til sveitarfélaganna rekstrarlega, að fara rækilega yfir skyldur, réttindi og ábyrgð aðila að því er varðar börn og hugsanleg óhöpp sem þau verða fyrir í skólum, á skólalóðum, í íþróttasölum eða með öðrum hætti á svæðum sem tengd eru skólum. Ég tel að þessi ábyrgð sé illa skilgreind nú. Og ég tel að það sé óheppilegt bæði fyrir kennara og aðra að þessi ábyrgð á börnunum sé jafnóskýr og raun ber vitni. Ég vil því draga það mál inn í þessa umræðu og að sest verði yfir það mjög rækilega að skilgreina þessa ábyrgð nákvæmlega, hvað er hvers í þessum efnum.