Steingrímur J. Sigfússon (um fundarstjórn):
Herra forseti. Ég vek athygli forseta á því að það mál sem hér var tekið upp til umræðu áðan af einum hv. þm. liggur þegar fyrir í fyrirspurn á þskj. 212 og er 203. mál Alþingis þar sem spurt er mjög ítarlega um öll efnisatriði sem hv. þm. gerði að umtalsefni í umræðum um óundirbúna fyrirspurn og reyndar nokkur í viðbót í sjö töluliðum. Ég vek athygli forseta á þessari staðreynd í málinu. Mér er ljóst að það hlýtur að hafa farið fram hjá hv. þm. að svo er en spurningin er þá til hæstv. forseta hvernig fara beri með mál í sambærilegum tilvikum.