[prenta uppsett í dálka] 28. fundur
Samgönguráðherra (Halldór Blöndal):
Herra forseti. Ég er fullkomlega sammála efnislega því sem fram kom hjá hv. fyrirspyrjanda um mikilvægi þess að komið verði fyrir áningar- og keðjunarstöðum þar sem við á. Vegagerðin svarar fyrirspurninni svo, með leyfi hæstv. forseta:
,,Vegagerðin hefur komið upp aðstöðu fyrir langferðabifreiðarstjóra á nokkrum stöðum á landinu þar sem ökumenn geta hvílst eða sett keðjur á bifreiðar sínar á vetrum. Þessir staðir eru ýmist fullbúnir eða fyrirhugaðir, þó ekki síðar en á næsta ári. Hér á eftir verða taldir upp þessir áningar- og keðjunarstaðir sem eru samtals 24 að tölu.
Fullbúnir áningarstaðir, svefnstaðir og keðjunarstaðir: Freysnes í Öræfasveit, Lómagnúpur við Skeiðarársand, Kirkjubæjarklaustur, Langasker á Mýrdalssandi, við vegamót Skeiðavegar og hringvegar, Fiskilækur í Melasveit, Vegamót á Snæfellsnesi, við vegamót Stykkishólmsvegar og Snæfellsnesvegar á Snæfellsnesi, Ögurnes í Ísafjarðardjúpi, Staðarskáli í Hrútafirði, Víðihlíð í Víðidal, Svartárhorn í Langadal, Vallhólmi í Skagafirði, austan Fremrakots ...`` (Gripið fram í: Kota.) Kota, já. Það segir Davíð Stefánsson:
,,austan Fremrakots í Norðurárdal í Skagafirði, Þernunes í Reyðarfirði, sunnan Breiðdalsvíkur.
Fullbúnir keðjunarstaðir, ekki svefnstaðir: Krókalækir í Borgarfirði við Holtavörðuheiði, norðan Bakkasels í Öxnadal.
Fyrirhugaðir áningar- og keðjunarstaðir teknir í notkun í síðasta lagi 1998: Skammt austan Jökulsár á Sólheimasandi, Arnarbæli í Norðurárdal, Borgarfirði, Biskupsháls á Mývatnsöræfum, austan Almannaskarðs í Austur-Skaftafellssýslu.
Fyrirhugaður keðjunarstaður, ekki svefnstaður: Hraunhöfn í Staðarsveit á Snæfellsnesi.``
