Svavar Gestsson:
Herra forseti. Í umsögnum allra háskóla í landinu var kvartað undan þeirri miðstýringaráráttu sem fram kemur í frv. um háskóla. Hún birtist m.a. í því að gert er ráð fyrir því að menntmrh. eigi án takmörkunar að tilnefna og skipa tvo menn í háskólaráð, yfirstjórnir allra háskóla í landinu. Þetta er algerlega óeðlilegt fyrirkomulag og er furðulegt að umræðan um málið í þinginu skuli vera komin þetta langt án þess að Framsfl. skuli sérstaklega hafa verið krafinn um skýringar á því af hverju hann er að flytja allt þetta vald til menntmrh. sem m.a. birtist í þessari grein. Hana er ekki hægt að styðja.