[prenta uppsett í dálka] 45. fundur
Steingrímur J. Sigfússon:
Herra forseti. Frammistaða hæstv. félmrh. í þessu máli er með miklum endemum. Auðvitað er alveg ljóst að hæstv. ráðherra með einum eða öðrum hætti duldi þá staðreynd við meðferð málsins á þinginu hafi hann þá þegar verið ákveðinn í því að skerða atvinnuleysisbæturnar eins og raun bar vitni. Mér sýnist fljótt á litið að þetta hafi gerst ósköp einfaldlega þannig að hæstv. ráðherra hafi farið þá fjallabaksleið í málinu að hann breyti skilgreiningunni á því hvað skuli teljast fullt starf og gerir ríkari kröfur til vinnuskyldu, til að það sé uppfyllt, en áður var með breyttri skilgreiningu og út úr því kemur í öllu falli sú niðurstaða að um verulega skerðingu bóta hjá ýmsum er að ræða. Þetta er mergurinn málsins og auðvitað er hreinlegast fyrir hæstv. ráðherra að viðurkenna þetta.
Í öðru lagi hafa efndirnar á því að leiðrétta þetta verið í skötulíki. Það liggur líka fyrir. Hæstv. ráðherra kom hér og sagði að sér þætti það leitt ef eitthvað hefði farið úr böndunum hjá sér.
Í þriðja lagi er auðvitað öll útkoman á þessum (Forseti hringir.) atvinnuleysisbótamálum hjá hæstv. ráðherra hin hörmulegasta, (Forseti hringir.) þar með talið að afnema tengingu atvinnuleysisbóta við laun.
