[prenta uppsett í dálka] 46. fundur
Kristín Ástgeirsdóttir (andsvar):
Hæstv. forseti. Í 19. gr. þessa frv. er kveðið á um að í sérlögum, samþykktum eða skipulagsskrám hvers háskóla skuli setja reglur um hvernig hátta skuli gjaldtöku af nemendum vegna náms við viðkomandi skóla. Þetta er býsna opið ákvæði og í ljósi reynslunnar, hæstv. forseti, vegna þess m.a. hvernig inntökugjöld hafa verið hækkuð á háskólastiginu og komið var á gjaldi og fallskatti á nemendur framhaldsskólanna, þá tel ég rétt í umræðunni að ítreka að ég er andvíg skólagjöldum. Mér finnst það vera ein af grundvallarreglum okkar samfélags og hefur verið frá því fræðslulög voru fyrst sett hér á landi, að almenn menntun skuli vera ókeypis og greidd úr okkar sameiginlegu sjóðum. Ég tel að sú regla sé eitt af því sem stuðlað hefur að hvað mestum jöfnuði í um áratuga skeið og geri það að verkum að almenn menntun er hér með því skárra eða besta sem gerist í heiminum ef við lítum á heiminn sem heild. Ég tel afar mikilvægt að halda í slíkar reglur og að ekki verði haldið inn á þær brautir að velja inn í skóla þá sem geta greitt fyrir menntun sína.
