Fyrirspyrjandi (Tómas Ingi Olrich):
Herra forseti. Á Alþingi hefur verið lagt fram frv. til laga um stjórn fiskveiða sem hefur þann tilgang að koma í veg fyrir að aflahlutdeildir safnist í of miklum mæli á einstaka aðila. Í athugasemdum með frv. kemur fram að kvótaeign stærstu fyrirtækja er á bilinu 4--5%, eignarhald er mjög dreift og samþjöppun aflahlutdeilda á einstaka aðila hefur ekki verið ýkja hröð. Miðað við þær upplýsingar verður ekki séð að þörf sé á þessu frv. og sérstökum ráðstöfunum til að hindra þróun stærstu útgerðar- og fiskvinnslufyrirtækjanna á þeirri forsendu að hætta sé á því að í krafti kvótaeignar sinnar fái sjávarútvegsfyrirtæki of mikil völd í og staða þeirra gagnvart stjórnvöldum geti orðið of sterk.
Af þessu tilefni er nauðsynlegt að fá upplýsingar um stærð og fyrirferð fyrirtækja í öðrum atvinnugreinum svo bera megi saman hættu á fákeppni og yfirþyrmandi áhrifum einstakra fyrirtækja á stjórnvöld, annars vegar í sjávarútvegi og hins vegar í ýmsum öðrum atvinnugreinum. Ég hef því flutt eftirfarandi fyrirspurn til hæstv. samgrh.:
1. Hefur ráðherra upplýsingar um markaðshlutdeild tveggja stærstu fyrirtækja landsins í áætlunarflugi?
2. Telur ráðherra ástæðu til, með tilliti til markaðshlutdeildar þessara fyrirtækja, að setja lög sem takmarka umsvif og starfsemi þeirra umfram það sem samkeppnislög segja til um?