Rannveig Guðmundsdóttir:
Herra forseti. Við höfum gagnrýnt harðlega að við vorum kölluð til þings í bráðræði og án samráðs. Við höfðum líka gagnrýnt það við 1. umr. þessa máls að frv. sem slíkt mætti ekki hæstaréttardóminum sem skyldi. Það hefur síðan breyst gersamlega í nefnd. Það er orðið nýtt mál sem liggur á borðum þingmanna en því miður engu betra hvað varðar hæstaréttardóminn sem slíkan.
Nú kemur líka í ljós að ekki gafst nægilegur tími í nefndinni til að yfirfara umsagnir sem er einhver mikilvægasti þáttur í nefndarstarfi og ég gagnrýni það mjög alvarlega, herra forseti. Þetta eru vond vinnubrögð og það sem er að gerast hér er að Alþingi er að setja vonda löggjöf.