Frsm. minni hluta sjútvn. (Svanfríður Jónasdóttir) (andsvar):
Herra forseti. Fólkið í byggðarlögunum, sem hv. þm. vísar til, á rétt á réttlátara kerfi. Það á rétt á jafnrétti. Það á ekki að þurfa að búa við úthlutunarkerfi sem byggir á mismunun og einhverju sem það sjálft hefur ekkert með að gera. Fólkið á rétt á kerfi sem byggir á jafnræði og 1. gr. laganna um stjórn fiskveiða en ekki á því ákvæði laganna sem undirbyggir nánast fullkominn einkaeignarrétt á þeim veiðirétti sem er hér á Íslandsmiðum. Þarna greinir okkur sannarlega á.
Varðandi hitt, þá vil ég vekja athygli þingmannsins á þeim tillögum sem fram koma í nál.: ,,Það er tillaga minni hlutans að Alþingi endurskoði lögin,`` o.s.frv., en þar segir í IV. kafla, 2. tölul. :
,,Því sem segir í dómi Hæstaréttar um sambærilega hlutdeild í sameigninni verði mætt með auðlindagjaldi sem getur myndast við uppboð veiðiheimilda eða veiðileyfagjaldi sem lagt yrði á með öðrum hætti.``
Þar liggur það fyrir, herra forseti.