Steingrímur J. Sigfússon:
Herra forseti. Hér er á ferðinni sérstök leiðrétting á stöðu smábáta undir sex brúttórúmlestum sem róa á aflamarki, löngu tímabær og langþráð viðurkenning á því að þessi hluti flotans --- að vísu aðeins stærri hluti, þ.e. allir smábátar undir tíu tonnum sem völdu aflamark árið 1990 --- hefur á umliðnum árum fengið verri útreið vegna skertra veiðiheimilda í þorski en nokkur annar hluti flotans. Ég fagna þessari leiðréttingu þó í litlu sé og seint sé.
Ég vek athygli á því að það þarf að athuga betur útfærslu ákvæðisins og ég vona að í sjútvn. verði það gert milli umræðna, þ.e. hvort stærðarmörkin eigi ekki að vera tíu brúttórúmlestir í staðinn fyrir sex.