[prenta uppsett í dálka] 58. fundur, 123. lþ.
Fjármálaráðherra (Geir H. Haarde):
Herra forseti. Það er nú kannski ekki miklu við þessa umræðu að bæta. Hér hafa komið fram flest meginsjónarmið sem hægt er að flytja á þessum vettvangi við þetta knappa umræðuform. Niðurstaða mín er sú að ég er sammála því að taka þurfi heildstætt á þessu máli. Það þarf að samræma ákveðin atriði. Það er óeðlilegt að hafa í gangi mörg mismunandi réttindakerfi varðandi þætti eins og þennan, sem fólk gengst undir, lendir í eða verður fyrir, hvernig sem það er orðað, óháð því hvort það er í vinnu hjá ríkinu eða einhverjum öðrum. Sem betur fer eignast menn börn óháð starfi sínu eða vinnuveitanda. Aðalatriðið er auðvitað að búa þannig að foreldrum í landinu að þeir geti orðið þeirrar ánægju aðnjótandi að skipta með sér því að ala önn fyrir börnum sínum meðan þau eru á þessum viðkvæma aldri. Það er auðvitað kjarni málsins.
Ég er ekki tilbúinn að kveða upp úr um leiðir í því sambandi, þær eru eflaust margar til. Aðalatriðið held ég að sé að reyna að ná fram almennri samræmingu á öllum vinnumarkaðnum, hvort sem það er gert með samningum eða í gegnum tryggingakerfið eins og ég tel nú eðlilegra.
