Jón Kristjánsson (andsvar):
Herra forseti. Það er eitt atriði í ræðu hv. 4. þm. Austurl. sem ég vildi koma örlítið inn á í andsvari. Hann sagði að stóriðja á Austurlandi ætti öllu að bjarga í byggðamálum en ekkert yrði af þeim áformum og menn mændu á atvinnuuppbyggingu frá útlöndum.
Ég kem upp í andsvari vegna þess að þetta er hlutur sem maður hefur heyrt mjög mikið á Austurlandi, frómar óskir hv. þm. og fleiri um að það verði ekkert af þessu. En ég spyr: Á aldrei að athuga slíka möguleika? Eigum við ekki að vera menn til þess að skoða slíkt, vinna að því að koma upp fleiri stoðum undir atvinnulífið á Austurlandi? Er það mest um vert nú að þau áform sem hafa verið uppi á Reyðarfirði verði ekki að veruleika? Á þá ekki að skoða neitt í framhaldi af því? Sannleikurinn er sá að engin breyting hefur orðið á því viðræðuferli en hins vegar er aldrei hægt að segja neitt um þetta fyrr en búið er að skrifa undir viljayfirlýsingar um að fara í framkvæmdir. Það hefur alltaf legið fyrir. En spurningin er hvort það er skoðun hv. þm. að aldrei eigi að skoða atvinnuuppbyggingu sem kemur frá útlöndum eða í samvinnu við útlendinga.