Magnús Árni Magnússon:
Hæstv. forseti. Mig langar að taka heils hugar undir þetta mál sem hér liggur fyrir um nýja skipan stjórna allra rannsókna- og vísindastofnana á vegum hins opinbera með það fyrir augum að efla sjálfstæði þeirra til hvers konar rannsókna og vísindaiðkana.
Óhæði vísindmanna er grundvallarskilyrði til þess að hægt sé að taka mark á þeim. Því miður virðast hins vegar vísindamenn horfa á viðfangsefnin í gegnum gleraugu þeirra sem afhenda þeim bjargræðið. Við þekkjum fjölmörg dæmi um slíkt og væri kannski fulllangt mál að fara rekja einhver þeirra hér.
Í öllum pólitískum hitamálum má nánast alltaf finna vísindamenn sem styðja gagnstæð sjónarmið vísindalegum rökum. Það að hagsmunasamtök hafi tök á rannsóknastofnunum hins opinbera gerir álit þeirra á vissan hátt tortyggilegt. Þeir góðu vísindamenn sem þar starfa eiga betra skilið en að skipan stjórna stofnananna sem þeir starfa á sé jafntortryggileg og raun ber vitni. Ég vil því lýsa yfir stuðningi mínum við þessa tillögu.