Ísólfur Gylfi Pálmason:
Herra forseti. Ég vil þakka hv. fyrirspyrjanda Svavari Gestssyni fyrir að vekja máls á þessu. Menningartengd ferðaþjónusta er ört vaxandi atvinnugrein hér á landi eins og annars staðar. Þetta er því kærkomið verkefni. Ég vil einnig þakka hæstv. forsrh. fyrir orð hans.
Það hefur verið mikið keppikefli okkar sem erum fulltrúar í Vestnorræna ráðinu að byggja upp og minnast tímamótanna sem fram undan eru í Brattahlíð á Grænlandi. Mér finnst vert að þakka forsrh. og ríkisstjórninni fyrir þeirra hlut í þeim efnum. Við horfum til framtíðar þegar við veltum þessum málum fyrir okkur. Samstarf okkar við Grænland skiptir miklu máli og tengsl þessara verkefna eru greinileg.