[prenta uppsett í dálka] 68. fundur, 123. lþ.
Fyrirspyrjandi (Ísólfur Gylfi Pálmason):
Herra forseti. Seinni fyrirspurn minni beini ég einnig til hæstv. samgrh. Í þáltill. minni um aukna landkynningu í ferðaþjónustu í dreifbýli er gert ráð fyrir sérstakri framkvæmdaáætlun um eflingu atvinnugreinarinnar enda skiptir ferðaþjónusta landsbyggðina ekki síður mjög miklu máli en þéttbýlið. Afþreying í ferðamennsku er afar mikilvæg, hún þarf að vera fjölbreytt og það er ánægjulegt að fylgjast með því á hvern hátt afþreying í ferðamennsku hefur aukist á síðustu missirum. Fjölbreytni safna á Íslandi er að verða talsvert mikil og núna um helgina varð ég þeirrar gleði aðnjótandi að vera viðstaddur opnun verslunarsafns í Rangárvallasýslu þar sem Kaupfélag Rangæinga, eða starfsmannafélag Kaupfélags Rangæinga var að opna mjög merkilegt sögusafn um þróun verslunarmála í Rangárvallasýslu. Þetta safn er í húsi þar sem stendur yfir sýning á Njálssögu einnig, sem er í eigu Sögusetursins á Hvolsvelli. Aðstaða ferðamanna er mjög mikilvæg og það skiptir miklu máli að aðstaðan sé góð og í raun og veru sem fjölbreytilegust þannig að skapa megi sem mestar tekjur í sambandi við ferðamennsku.
Fyrirspurn mín til hæstv. samgrh. er eftirfarandi:
,,1. Hver hefur verið árleg þróun á framboði gistirýma á Íslandi milli ára síðustu tuttugu ár?
2. Hvernig skiptist fjöldi gistirýma milli landshluta á þessu tímabili?``
