Sighvatur Björgvinsson:
Herra forseti. Ég hef ekki mörgu við það að bæta sem hér hefur komið fram öðru en því að ég furða mig á að ekki skuli hafa komið fram eitt einasta orð t.d. frá formanni umhvn. í þessari umræðu um það hvernig hann hyggst halda á þessu máli. Hyggst formaður umhvn. beita sér fyrir því að tillagan sem hann og nefnd hans hefur verið að fjalla um í allan vetur geti komið hingað til afgreiðslu? Ég trúi því varla að það sé andstætt vilja ríkisstjórnarinnar að Alþingi fái að tjá sig um þetta mikilsverða mál þannig að í ljós komi hversu margir alþingismenn séu reiðubúnir til að styðja þá ákvörðun sem ríkisstjórnin hefur tekið og hversu margir eru andvígir.
Ég beini þeirri fyrirspurn til formanns umhvn., sem situr í salnum og hefur ekki tekið þátt í umræðunum, hvort hann muni beita sér fyrir því að þessi margumrædda tillaga geti komið til þinglegrar meðferðar að lokinni umfjöllun í umhvn.
(Forseti (ÓE): Forseti væntir þess að hægt verði að ræða efnislega þetta atriði í umræðum um utanríkismál á eftir.)