Valgerður Sverrisdóttir:
Hæstv. forseti. Ég tel að það hafi verið hárrétt ákvörðun hjá hæstv. ríkisstjórn að ákveða að þetta skip skuli smíða á Íslandi og tel reyndar að það hafi legið nokkurn veginn fyrir að svo yrði gert miðað við jákvæðar yfirlýsingar hæstv. iðnrh. og hæstv. dómsmrh. á síðasta þingi.
Ég held að enginn vafi leiki á því að íslenskar skipasmíðastöðvar muni ráða við þetta verkefni og er þar að mínu mati Slippstöðin á Akureyri nokkurs konar kjarnafyrirtæki. Sú verkþekking sem var mjög rík í okkar samfélagi fyrir allmörgum árum, þ.e. að smíða skip, var í ákveðinni hættu en með þessari ákvörðun tel ég að henni hafi verið bjargað. Ég lýsi sérstakri ánægju með þessa ákvörðun.