[prenta uppsett í dálka] 11. fundur, 123. lþ.
Tómas Ingi Olrich (andsvar):
Herra forseti. Í raun er þarna um að ræða fullyrðingu gegn fullyrðingu. Hv. þm. Hjörleifur Guttormsson fullyrðir að minni hætta sé á að brotist verði inn í dreifða gagnagrunna heldur en miðlægan gagnagrunn. Ég hef ekki heyrt þetta rökstutt. Ég hef hins vegar heyrt tölvusérfræðinga tala um að auðveldara sé að verja upplýsingar í miðlægum gagnagrunni, vel dulkóðuðum miðlægum gagnagrunni, en í dreifðum gagnagrunni. Þeir segja líklegra að menn séu reiðubúnir til að verja miklu fé til þess að dulkóða þessar upplýsingar í miðlægum gagnagrunni heldur en í dreifðum gagnagrunnum. Að sjálfsögðu er alveg rétt hjá hv. þm. að þetta ber að skoða, ég er alveg sammála því. Ég hef ekki á móti því að farið verði nákvæmlega yfir það að hve miklu leyti þetta frv. um miðlægan gagnagrunn stenst viðmiðanir í samþykktum Evrópuráðsins, bæði í hinum miklu sáttmálum sem við höfum gert um þessi mál og líka í ráðleggingum ráðherraráðs Evrópuráðsins. Ég tek undir það.
