Sigríður A. Þórðardóttir (andsvar):
Herra forseti. Hv. þm. Bryndís Hlöðversdóttir taldi vísindafrelsi ógnað með þessu frv. og vitnaði í bréf tveggja virtra vísindamanna. Það bréf var skrifað í vor. Frv. hefur tekið miklum breytingum síðan það bréf var skrifað.
Ég legg áherslu á að frv. fjallar eingöngu um gerð miðlægs, ópersónutengds gagnagrunns og sá gagnagrunnur er viðbót við aðra gagnagrunna sem eru persónutengdir inni á stofnunum og verða það áfram. Áfram hafa vísindamenn sömu möguleika um aðgengi að upplýsingum sem færðar eru inni á stofnunum, eins og verið hefur. Þess vegna breytir frv. engu um það frelsi og aðgang að upplýsingum sem vísindamenn hafa í dag.
Ég leyfi mér að vitna í grg. með 9. gr. þar sem segir:
,,Rétt er að undirstrika að aðgangur að þeim upplýsingum sem skráðar eru á einstökum stofnunum eða hjá sjálfstætt starfandi heilbrigðisstarfsmönnum verður óbreyttur.``