[prenta uppsett í dálka] 25. fundur, 123. lþ.
Hjálmar Jónsson (andsvar):
Herra forseti. Ég get svarað því einfaldlega með því að mér finnst miklu betra að búa úti á landi en á höfuðborgarsvæðinu þó að vinnustaðurinn sé hér. Ég vísaði til þess í ræðu minni og vil nú vísa þessu frá að ég hafi talað um að það væri vont að búa úti á landi. Það er öðru nær Það er miklu betra að búa þar heldur t.d. hér.
Það er ekki rétt sem fram hefur komið stundum í dag að menningarlíf sé minna á landsbyggðinni. Það er að mínum dómi meira. Það er almennari þátttaka í því en hér og það er í vissum skilningi menningarlega og félagslega meira þéttbýli á landsbyggðinni en á höfuðborgarsvæðinu. Fólk veit betur hvert af öðru og líður oft og tíðum betur.
Það kemur líka fram í skoðanakönnun Stefáns Ólafssonar og Félagsvísindastofnunar að fleiri vilja búa úti á landi af þeim sem vilja á annað borð flytja sig, þ.e. það vilja fleiri úr Reykjavík og nágrenni flytja út á land en vilja flytja af landsbyggðinni til Reykjavíkur. Ástæðan fyrir því að samt sem áður er straumurinn hingað er fyrst og fremst sú að aðstæðurnar bjóða ekki upp á sömu kjör á landsbyggðinni. Þess vegna verðum við að jafna þennan hlut. Við verðum að auka hlut landsbyggðarinnar, jafna þann aðstöðumun sem er fyrir hendi og ég endaði ræðu mína á að segja að við þyrftum að taka betur á í málefnum landsbyggðar en hingað til hefði verið gert og spara ekki til þess.
