[prenta uppsett í dálka] 26. fundur, 123. lþ.
Einar K. Guðfinnsson:
Virðulegi forseti. Það er ástæða til þess að fagna uppbyggingunni sem átt hefur sér stað í fjarnámi hér á landi á allra síðustu árum. Það er ekki síst fyrir áhuga og frumkvæði hæstv. menntmrh. að þetta hefur gerst. Ég vil líka vekja athygli á því að Byggðastofnun, undir forustu hv. þm. Egils Jónssonar, beitti sér fyrir því að setja upp svokallaða byggðabrú og sem sköpuðu möguleika til fjarnáms í landshlutum sem ekki höfðu verið áður. Þetta er ómetanlegt fyrir hinar dreifðu byggðir, hefur t.d. þegar skilað sér áþreifanlega á Ísafirði þannig að til eftirbreytni er.
Nú finnst mér komið að því að skoða hvernig hægt sé að beita þessari tækni til að efla grunnskólanámið, einkanlega úti í hinum dreifðu byggðum. Það er ánægjulegt til þess að vita að Samband sveitarfélaga hefur óskað eftir samstarfi við menntmrn. og Byggðastofnun við tilraunaverkefni sem fram fer í tengslum við skólana í Strandasýslu. Ef það tekst sem skyldi mun það efalaust þýða mikla byltingu í grunnskólahaldi víða um landið.
