Gísli S. Einarsson:
Herra forseti. Ég tek undir með síðasta ræðumanni og þakka hv. þm. Magnúsi Stefánssyni fyrir að hreyfa þessu máli. Margoft hefur verið kvartað á undanförnum árum beint til Ríkisútvarpsins. Þetta mál hefur einnig verið rætt á Alþingi hvað eftir annað og enn þá er það svo að í Kolbeinsstaðahreppnum er mjög slæmt samband bæði með síma og útvarp. Á Bröttubrekku dettur út útvarp og sími á þeirri leið yfir á Heydal og það er margsannað að margir svokallaðir svartir blettir eru enn þá á Vesturlandi þrátt fyrir að ástandið hafi batnað eftir að settur var magnari á Gufuskálum eða endurvarp á Gufuskálum en ég tek undir að ástæða er til þess að skoða þetta mál miklu betur og setja í þetta fjármagn. Það hefur alltaf verið kvartað undan því að það væri svo vont að ná í rafmagn. Við eigum núna möguleika að setja jafnvel upp vindmyllur til að framleiða rafmagn á þeim stöðum þar sem þyrfti að koma fyrir endurvarpa.