[prenta uppsett í dálka] 29. fundur, 123. lþ.
Ágúst Einarsson:
Herra forseti. Ég þakka fyrir að hæstv. félmrh. er ekki utanrrh. íslenska lýðveldisins. Ef hann telur það vera í farsælum farvegi að standa ekki við alþjóðlegar skuldbindingar þá er hann að mínu mati á villigötum. Það er alveg ljóst að þegar ILO gerir sínar samþykktir þá er gert ráð fyrir því að þær fari í ákveðinn farveg í þjóðlöndunum. Það hefur alls staðar gerst í nágrannalöndunum. Hér hefur ríkisstjórnin kosið að leita allsherjarsamráðs --- og það kalla ég neitunarvald VSÍ, eða ef menn vilja, neitunarvald ASÍ í þeim efnum --- en láta ekki samþykktirnar koma til eðlilegrar þinglegrar afgreiðslu á Alþingi.
Þetta er ámælisvert, herra forseti, og það tekur varla nokkru tali að ræða málin á þeim grundvelli að segja að þetta sé í nokkuð góðu lagi. Það er miklu betra, herra forseti, að við hættum þátttöku í Alþjóðavinnumálastofnuninni ef við ætlum ekki að gera neitt með samþykktir hennar.
