Fjármálaráðherra (Geir H. Haarde) (andsvar):
Herra forseti. Við höfum ekki séð ástæðu til að gera ráð fyrir miklum breytingum á tekjuhlið í þessu máli. Það er erfitt að segja fyrir um það á hvern veg þessar breytingar verða. Það er alveg hugsanlegt að hlutabréfaafsláttur í rýmkuðu formi eins og hér er gert ráð fyrir kosti ríkissjóð einhverja peninga, en það má líka gera ráð fyrir að til að mynda breytingin á skattfrelsismörkum fjármagnstekjuskatts skili tekjum í ríkissjóð. Niðurstaða okkar í þessu efni er sú að gera eiginlega ekki ráð fyrir neinum breytingum. En við munum að sjálfsögðu meta það betur þegar sýnt verður hver afdrif þessa frv. verða. Ég á reyndar ekki von á öðru en að það verði samþykkt fyrir áramót og þá mundi það koma inn í tekjumat okkar fyrir 3. umr. fjárlaga. Að öðru leyti þakka ég þingmanninum fyrir undirtektir við málið.