Fjármálaráðherra (Geir H. Haarde) (andsvar):
Herra forseti. Ég hygg að við hv. þm. skiljum þetta mál til hlítar, báðir tveir. Þarna er um að ræða ákveðið vandamál sem lýtur að hinum fjarlægustu svæðum frá Reykjavík. Eins og ég sagði áðan er ég tilbúinn til þess að leggja mig fram um að finna leiðir til þess að koma til móts við þessi sjónarmið ef í ljós kemur að þarna sé um að ræða óheyrilega kostnaðaraukningu og nýjan vanda sem hafi verið búinn til í vor í tengslum við breytingarnar þá.
En bifreiðagjaldið er auðvitað annars eðlis en þungaskatturinn. Það miðast við þyngd á ökutæki og hefur ekki miðast neitt við notkun þess, gjald sem á rætur að rekja til stjórnarmyndunar á árinu 1987 ef ég man rétt en þungaskatturinn er hins vegar hluti af fjáröflun til vegagerðar eins og lögin um hann heita. Þau heita lög um fjáröflun til vegagerðar. Hann er nátengdur bensíngjaldinu sem menn greiða í bensínverði og miðast við það að menn borgi eftir því hvað þeir nota vegina mikið, þ.e. hvað þeir keyra marga kílómetra á hverju gjaldtímabili. Þess vegna er þetta í eðli sínu öðruvísi en þegar um er að ræða bifreiðagjaldið og náttúrlega er það sjónarmið ríkjandi í þessu að þeir sem nota vegina mest eigi að greiða mest til þeirra.
Þetta er það sjónarmið sem fyrrv. samgrh., síðasti ræðumaður, þekkir náttúrlega mjög vel og óþarft að hafa fleiri orð um það. En ég held ég að aðalatriðið sé að komast að einhverri skynsamlegri niðurstöðu í þessu og málið fer þá núna til nefndarinnar. Hún mun fá öll gögn sem við höfum í fórum okkar til þess að fara yfir þetta og ég vænti þess að eiga gott samstarf við nefndarmenn, bæði stjórn og stjórnarandstöðu um að koma málinu í viðhlítandi form fyrir jólin því að það er nauðsynlegt að gera það og ganga frá því áður en þingið fer í jólafrí.