[prenta uppsett í dálka] 32. fundur, 123. lþ.
Kristín Jóh. Björnsdóttir:
Herra forseti. Þetta hefur verið athyglisverð umræða og ég fagna því að hv. þm. Ögmundur Jónasson hóf máls á stöðu félagslega íbúðakerfisins á Alþingi. Félagslega íbúðakerfið er því miður stór baggi á sveitarfélögunum. Ástand íbúða er víða dapurt, bæði vegna upprunalegra byggingargalla og viðhaldsleysis.
Það er mikilvægt fyrir sveitarfélögin að leita allra leiða til að aðstoða láglaunafólk í húsnæðisvanda, en húsnæðismálin eru stór og mikilvægur þáttur á landsbyggðinni. Greiðsluvandi sveitarfélaganna er mikill og sölumöguleikar engir nema söluverð félagslegra íbúða verði lækkað í takt við markaðsverð viðkomandi sveitarfélags. Miklir fjármunir og vinna hafa farið í félagslega íbúðakerfið hjá sveitarfélögunum. Flest þeirra bíða lausna frá ríkinu á þessum stóra vanda sínum. Því fyrr sem lausnin finnst því betra fyrir alla aðila.
Raunhæft niðurfærsluverð félagslegra íbúða er 90% ríkisins og 10% sveitarfélaganna en ekki helmingaskipti eins og tillögur hafa verið um hingað til. Sú skipting leysir engan vanda.
Herra forseti. Ég ítreka mikilvægi þess að finna lausn á félagslega íbúðakerfinu samhliða vanda sveitarfélaganna og vona að það takist sem fyrst.
