[prenta uppsett í dálka] 35. fundur, 123. lþ.
Frsm. 2. minni hluta heilbr.- og trn. (Bryndís Hlöðversdóttir) (andsvar):
Herra forseti. Þetta eru augljósir útúrsnúningar sem hv. þm. Tómas Ingi Olrich hefur hér í frammi. Umræðan um upplýst samþykki tengist því ekki síður að um er að ræða persónuupplýsingar í þessum grunni, persónugreinanlegar upplýsingar. Á þeim forsendum hefur m.a. verið vakin athygli á því að fara þurfi fram á upplýst samþykki. Ég vil t.d. nefna tölvunefnd sem á að framkvæma þessa hugmynd fyrir hv. ríkisstjórn, hvernig sem þeir ætla nú að þvinga hana til þess þar sem hún er greinilega á móti því og er ekki á þeirri skoðun að þarna séu ópersónugreinanlegar upplýsingar. Er Þorgeir Örlygsson prófessor, okkar helsti sérfræðingur á sviði persónuverndar, ekki líka eitthvað tortryggilegur úr því hann getur ekki fallist á þessar hugmyndir og kokgleypt þær hugmyndir sem stór hluti, a.m.k. vísindamanna, langstærstur hluti íslenskra vísindamanna og erlendra er á móti? En hann er kannski eitthvað dularfullur líka eins og ég. Það má vel vera.
