Svavar Gestsson (andsvar):
Herra forseti. Ég tek eftir því í gögnum þessa máls að fjárlagaskrifstofa fjmrn. hefur metið hugsanlegan kostnað af framkvæmd frv. fyrir ríkissjóð. Ég tek líka eftir því að í grg. frv. er dálítil úttekt á stofnkostnaðarmati. Ég vil spyrja hæstv. ráðherra hvort hún hefði ekki talið eðlilegt að Ríkisendurskoðun fengi að fara sérstaklega yfir málið með hliðsjón af hinum nýju lögum um fjárreiður ríkisins sem voru samþykkt í fyrra eða hittiðfyrra vegna þess að nokkrir rekstrarkostnaðarliðir í frv. munu koma inn í fjárlög komandi ára ef frv. verður að lögum.