Hjörleifur Guttormsson:
Herra forseti. Hér er verið að greiða atkvæði um eitthvert allra stærsta mál sem hefur komið fyrir Alþingi Íslendinga um langt skeið. Þetta mál felur í sér að verið er að hleypa einkaaðila með sterkan bakgrunn erlendis inn í erfðaauðlindir Íslendinga og heilbrigðisupplýsingar þjóðarinnar.
Þetta mál felur í sér að á mannréttindadegi Sameinuðu þjóðanna er verið að brjóta gegn grundvallaratriðum í persónuvernd. Þetta mál felur í sér að verið er að ganga gegn samningsskuldbindingum Íslendinga. Við þingmenn óháðra höfum vísað á allt aðra leið í þessu máli. Við höfum lýst eindreginni andstöðu við þetta mál í heild sinni og munum berjast gegn þessu máli áfram ef þessi tillaga ekki hlýtur samþykki, en hún felur í sér að málinu verði vísað til ríkisstjórnarinnar. Ég segi já.