Steingrímur J. Sigfússon (andsvar):
Herra forseti. Ég ætla ekki að gera hv. þm. rangt til og ég tek fúslega við því að hann sé ekki stuðningsmaður séreignarsjóða. Hann svaraði fyrir það. Ég fagna því í sjálfu sér. Að öðru leyti held ég að við séum í verulegum mæli í grundvallaratriðum ósammála um það hvernig eigi að nálgast þetta mál og hvað skipti máli í þessu sambandi. Ég lít ekki á það sem löst heldur kost við samtryggingarsjóðinn að þar er mönnum ekki hent út á gaddinn þegar einhver persónuleg ávinnsla þeirra er búin. Þar er tryggingin jöfnuð út gagnvart örorku og öðru slíku og þar greiða menn inn á sinni starfsævi í jöfnum áföngum og menn eru ekki metnir eftir kynferði, aldri eða öðru slíku. Það er auðvitað hættan í hinu kerfinu. Við vitum held ég báðir, hv. þm., hvert líklegt sé að slíkt leiði ef menn opna fyrir það á annað borð. Við fórum í gegnum alla þessa umræðu og þarna rekst einfaldlega á tvenns konar hugmyndafræði. Það er alveg ljóst þannig að ég vísa bara til þeirrar umræðu og skal ekki lengja hana hér.