Sturla Böðvarsson:
Herra forseti. Hér er á ferðinni einstakt mál sem markar tímamót. Deilur um gagnagrunnsfrv. mega ekki og eiga ekki að bregða skugga á störf fjölmargra íslenskra vísindamanna sem vinna að rannsóknum á öðrum vettvangi.
Þær breytingar sem gerðar hafa verið á frv. voru nauðsynlegar og tryggja öryggi í framkvæmd laga um miðlægan gagnagrunn. Það skipulag sem lögin gera ráð fyrir á að geta aukið öryggi í meðferð sjúkraskýrslna og ákvæði um einkarétt er að mínu mati forsvaranlegt við þær aðstæður sem Íslensk erfðagreining hefur fært okkur upp í hendurnar.
Nú þegar niðurstaða er fengin skiptir öllu máli að ná sáttum við lækna og aðra vísindamenn sem verða að virða þá niðurstöðu sem af lögum leiðir. Ég styð frv.