Svanfríður Jónasdóttir (andsvar):
Herra forseti. Ég er í hópi þeirra sem hafa talið að skynsamlegt væri, út frá þeim rökum sem fram hafa komið og ýmsu því sem reifað hefur verið í umfjöllun um dóm Hæstaréttar, að hv. sjútvn. skoðaði lögin um stjórn fiskveiða í ljósi dómsins. Ég er í hópi þeirra. Mér hefur satt að segja fundist býsna margir stjórnarþingmenn hafa áhuga á því að taka eitt og annað upp af því tilefni að nú á að fara að breyta lögunum um stjórn fiskveiða. Ég ætla ekki að rekja það hér en mun gera það í ræðu minni síðar.
Mig langaði til að fá mat hv. þm. Guðmundar Hallvarðssonar á því sem dómur Hæstaréttar segir hér, með leyfi forseta:
,,Með þessu lagaákvæði er lögð fyrirfarandi tálmun við því að drjúgur hluti landsmanna geti, að öðrum skilyrðum uppfylltum,`` --- nú kemur það sem ég vil fá álit þingmannsins á --- ,,notið sama atvinnuréttar í sjávarútvegi eða sambærilegrar hlutdeildar í þeirri sameign sem nytjastofnar á Íslandsmiðum eru.``
Hæstiréttur leggur þetta sem sagt hvort á móti öðru að því er virðist að menn geti notið sama atvinnuréttar í sjávarútvegi eða sambærilegrar hlutdeildar í þeirri sameign sem nytjastofnar á Íslandsmiðum eru. Hvert er mat hv. þm. á þessari niðurstöðu Hæstaréttar? Hvernig telur hann að Alþingi Íslendinga geti mætt henni?