Frsm. meiri hluta fjárln. (Jón Kristjánsson):
Herra forseti. Fjárln. hefur lokið vinnu við frv. til fjárlaga fyrir árið 1999 og liggja fyrir frhnál. og tillögur til breytinga á frv. Nefndin hefur tekið nokkur mál til meðferðar sem eftir voru á gjaldahlið frv., farið yfir þann hluta þess sem varðar lántökuheimildir ríkissjóðs, fjallað um 7. gr. sem er heimildargrein og fjallað um B- og C-hluta þess. Þá hefur fjárln. einnig farið yfir tekjuhlið frv. og aflað umsagnar efh.- og viðskn. um hana.
Við 2. umr. fjárlaga skýrði ég frá því að fjárln. hefði nokkur atriði sérstaklega til meðferðar fyrir 3. umr. Ég mun nú gera grein fyrir niðurstöðunni um þessi mál en auk þess mun ég fjalla um heildarniðurstöðuna og áhrif hennar á stöðu ríkissjóðs og almenn áhrif á efnahagslífið í landinu áður en ég vík að skýringu þeirra brtt. sem liggja fyrir.
Fyrst ætla ég að víkja að byggðamálum. Þróun byggðamála hefur verið óhagstæð landsbyggðinni að undanförnu. Ekki er deilt um að sú þróun sé þjóðhagslega óhagkvæm. Fólksfækkun á landsbyggðinni og stöðug fjölgun á höfuðborgarsvæðinu umfram landsmeðaltal hefur þau áhrif að kalla á hraða uppbyggingu, þjónustu og mannvirkjagerð sem í mörgum tilfellum er fyrir hendi á landsbyggðinni. Ör íbúafjölgun getur einnig haft neikvæðar félagslegar hliðarverkanir.
Ekki er heldur deilt um að einhæfni atvinnulífs og hár framfærslukostnaður og aðstöðumunur í ýmsum greinum ýtir undir óhagstæða byggðaþróun. Samkvæmt byggðatillögu ríkisstjórnarinnar er gert ráð fyrir að stofna eignarhaldsfélög sem geti aðstoðað við að auka fjölbreytni í atvinnulífinu á landsbyggðinni. Til þessa verkefnis eru veittar 300 millj. kr. Til að auka jöfnun í tveimur veigamiklum þáttum framfærslukostnaðar eru veittar 140 millj. kr., 100 millj. til niðurgreiðslu á húshitunarkostnaði og 40 millj. til styrkveitinga vegna námskostnaðar. Með fjárveitingunni og hækkun fyrra árs eru námsstyrkir til framhaldsnáms í dreifbýli þar sem nám er ekki fyrir hendi í heimabyggð hækkaðir um helming.
Allir ljúka upp einum munni um að efling menntunar á landsbyggðinni sé undirstaða byggðar í landinu. Framhaldsskólarnir gegna lykilhlutverki í þessu tilliti. Einnig hefur áhugi aukist mjög á að allir landshlutar eigi virkan hlut í háskólanámi í gegnum fjarnám sem sé viðbót við þá möguleika sem fyrir eru í háskólanámi í landinu. Komið var til móts við óskir um fjarnámið við 2. umr. en við 3. umr. var ákveðið að veita 40 millj. kr. til framhaldsskólanna. Menntmrn. er falið að ráðstafa þessu fé og taka þá einkum til skoðunar fámennari framhaldsskólana og þá þætti samninga um þá sem fjalla um álag vegna kennslu.
Meiri hluti fjárln. er þeirrar skoðunar að fjárveitingar til framhaldsskólanna verði að vera á grundvelli samninga og undirstrika mikilvægi þeirra. Hins vegar telur meiri hlutinn að meta þurfi reynsluna af þessum samningum við skólakerfið í heild og áhrif þeirra á það starf sem skólunum er ætlað að vinna og þá stefnu sem þeim hefur verið mörkuð.
Með því sem ég hef rakið er stigið markvert skref í fjórum mikilvægum þáttum byggðamála, þ.e. atvinnumálum, húshitunarkostnaði, jöfnun námskostnaðar, styrkingu framhaldsskóla og þróun í fjarnámi.
Undanfarnar vikur hefur verið starfandi nefnd á vegum félmrn. sem fékk það hlutverk að skoða sérstaklega biðlista eftir búsetu og annarri þjónustu hjá svæðisskrifstofum fatlaðra. Nefndin hefur lokið störfum og lagði til að á næstu tveimur árum verði gert sérstakt átak til að leysa mál þeirra sem mesta þörf hafa fyrir búsetu hjá svæðisskrifstofum Reykjavíkur og Reykjaness. Í því skyni þarf að tryggja 46 millj. til rekstrar á árinu 1999 og 104 millj. kr. árið 2000. Stofnkostnaður er áætlaður 430 millj. kr. til byggingar eða kaupa á fimm sambýlum á hvoru svæði. Lagt er til að rekstrartalan verði tekin inn í fjárlögin en reynt að leysa úr húsnæðisþörfinni með leigusamningum í upphafi átaksins. 14 millj. kr. eru veittar til að greiða fyrir slíkum samningum.
Niðurstaða nefndarinnar var að ástandið í þessum málum í Reykjavík og ekki síður í Reykjaneskjördæmi væri þannig að átak til að leysa úr vandanum þyldi ekki bið. Það er í samræmi við þær áherslur sem bárust á borð fjárln. og komu skýrt fram hjá sveitarstjórnarmönnum í heimsókn nefndarinnar í Reykjaneskjördæmi í haust.
Milli 2. og 3. umr. fjárlaga var ákveðið að veita á fjáraukalögum, eins og ég hef þegar gert grein fyrir, 500 millj. kr. til stóru sjúkrahúsanna í Reykjavík til að koma til móts við uppsafnaðan vanda þeirra í árslok 1998. Þetta bætir stöðu sjúkrahúsanna verulega. Nú hafa borist þau tíðindi að gengið hafi verið frá samkomulagi borgarstjóra, fjmrh. og heilbrrh. um yfirtöku ríkisins á Sjúkrahúsi Reykjavíkur og ráðinn hafi verið einn forstjóri yfir báðar stofnanirnar, Ríkisspítala og Sjúkrahús Reykjavíkur. Með þessum breytingum ætti að vera auðveldara að móta hagkvæmt samstarf og verkaskiptingu sjúkrahúsanna í framtíðinni.
Svo ég víki að hækkun bóta almannatrygginga sem kom inn við 3. umr. þá ætla ég ekki að hafa um það mörg orð. Um þann þátt málsins og lagasetninguna sem því fylgir hefur verið rætt í dag. Sú hækkun hefur í för með sér hækkun á útgjaldahlið upp á 480 millj. kr. eins og ég kem að síðar.
Fjárln. fjallaði einnig um B-hluta stofnanir. Þar komu fulltrúar Ríkisútvarpsins og Rafmagnsveitna ríkisins á fund nefndarinnar. Fram hefur komið að Ríkisútvarpið hefur styrkt afkomu sína og nýlega var leyfð hækkun afnotagjalda til að gera því enn betur fært að sinna mikilvægu hlutverki sínu. Lögð er áhersla á það hlutverk Ríkisútvarpsins, og ég vil undirstrika það sérstaklega, að koma dagskrá sinni til allra landsmanna. Þetta veldur óhjákvæmilega kostnaðarauka miðað við keppinautana. Í þessu ljósi ber að skoða þá sérstöðu sem Ríkisútvarpið hefur með innheimtu afnotagjalda. Einnig ber að líta á menningarhlutverk Ríkisútvarpsins í þessu samhengi. Það er mikilvægt öryggistæki og stofnunin hefur afar mikilvægt hlutverk í því að varðveita andblæ líðandi stundar til framtíðarinnar. Það er gert með varðveislu dagskrárefnis og vinnslu innlendrar dagskrár. Ómetanlegir dýrgripir eru í vörslu Ríkisútvarpsins frá starfi þess í nær sjö áratugi.
Afkoma Rafmagnsveitna ríkisins er erfið og það á rætur að rekja til þess sem á stofnunina er lagt, að sinna því hlutverki að byggja og reka dreifikerfi í strjálbýli sem tekjur samkvæmt gjaldskrá standa ekki undir. Stofnuninni er gert að greiða arð til ríkissjóðs sem er að hluta endurráðstafað í dreifikerfi í sveitum og til rannsókna- og þróunarverkefna. Meiri hluti fjárln. telur að taka þurfi til meðferðar hvort eðlilegt sé að krefjast arðs af fyrirtækinu óháð afkomu þess. Viðræður um þau mál munu fara fram á næstunni milli fjmrn. og iðnrn.
Fjárln. hefur haft til meðferðar margs konar verkefni sem tilheyra undirbúningi hátíðarhalda árið 2000. Þegar hafa komið ákvarðanir frá Norðmönnum um gjafir tengdar þessum hátíðarhöldum. Tvö slík mál voru til meðferðar milli 2. og 3. umr. Þarna er um að ræða Auðunarstofu á Hólum í Hjaltadal og stafkirkju sem ákveðinn hefur verið staður í Vestmannaeyjum. Norðmenn gefa efnið í þessar byggingar en viðtakendurnir, Íslendingar, sjá um uppsetningu og frágang. Veittar eru 12 millj. til Auðunarstofu og 20 millj. vegna stafkirkjunnar. Gerð hefur verið kostnaðaráætlun um þessi verk sem hljóðar upp á 32 millj. fyrir Auðunarstofu og 38 millj. fyrir stafkirkjuna. Áætlað er að ljúka þessum verkum árið 2000.
Gert er ráð fyrir að hækka framlag til að standa undir útgjöldum vegna heimildargreinar fjárlaga. Nefna má að heimild er til að gera lokauppgjör vegna skulda lítilla hitaveitna en þessi mál hafa verið í meðferð á undanförnum árum. Þau eiga rætur að rekja til söluskatts sem hitaveiturnar greiddu af aðföngum á byggingartíma sínum.
Ég mun nú víkja að afkomuhorfum ríkissjóðs eftir þær breytingar sem gerðar hafa verið á fjárlagafrv. í meðförum fjárln. og áformum um niðurgreiðslu skulda. Áformað er að ríkissjóður greiði niður skuldir umfram nýjar lántökur er nemur 23,8 milljörðum kr. á næsta ári. Þá verða greidd niður lán sem nema 30 milljörðum kr. árin 1998 og 1999. Til að standa undir niðurgreiðslu lána á næsta ári koma ríflega 7 milljarðar kr. af reglulegri starfsemi ríkissjóðs en um 1,4 milljarðar koma frá fjármunahreyfingum og 7 milljarðar af sjóðstöðu frá árinu 1998. Samtals eru þetta 15,5 millj. kr. Loks renna 8,3 milljarðar kr. af eignasölu til niðurgreiðslna á lánum ríkissjóðs og renna því allar tekjur ríkissjóðs af eignasölu til að greiða niður lán. Af 23,8 milljarða kr. niðurgreiðslu lána á næsta ári koma því 35% af eignasölu og 65% af annarri starfsemi ríkissjóðs. Tekjujöfnuður ríkissjóðs batnar um 600 millj. kr. frá frv. til fjárlaga og verður 2,5 milljarðar kr. samanborið við 1,9 milljarða kr. í frv. til fjárlaga. Verður það að teljast nokkur áfangi og sýnir styrka stöðu ríkisfjármálanna.
Þrátt fyrir nokkra hækkun útgjalda sem m.a. stafar af ákvörðunum um hækkun á bótum almannatrygginga, launabreytingum og auknum framlögum til byggðamála þá gerir tekjuaukningin meira en vega upp á móti því. Tekjurnar vaxa um 3,7 milljarða kr. frá því sem áætlun fjárlaga gerði ráð fyrir. Af hækkun tekna má rekja ríflega helminginn til meiri hagvaxtar og umsvifa í efnahagsmálum en gert var ráð fyrir í frv. en um helmingur kemur af meiri hagnaði af eignasölu og auknum arðgreiðslum.
Staða efnahagsmála hér á landi undanfarin ár hefur fyrst og fremst einkennst af miklum hagvexti, stöðugleika í efnahags- og gengismálum, litlu atvinnuleysi og mikilli kaupmáttaraukningu almennings. Þannig hefur hagvöxtur verið um og yfir 5% árlega allar götur frá 1996. Verðbólga hefur verið með minnsta móti undanfarin fimm ár eða á bilinu 1,5--2,5% á ári. Kaupmáttur heimilanna hefur einnig aukist verulega, eða um 25% frá árinu 1995 og spáð er áframhaldandi 5% aukningu á næsta ári. Atvinnuleysi hefur minnkað verulega að undanförnu og er nú minna en í flestum nálægum ríkjum. Viðskiptajöfnuðurinn hefur hins vegar verið neikvæður undanfarin ár, bæði vegna mikilla og tímabundinna stóriðjuframkvæmda og mikillar aukningar neysluútgjalda. Af þessum sökum er mikilvægt að efla þjóðhagslegan sparnað á næstu árum, ekki síst með því að ríkissjóður skili afgangi og skuldir verði greiddar niður. Batnandi staða í efnahags- og atvinnumálum kemur fram í breytingu við 3. umr. fjárlaga þar sem framlag til Atvinnuleysistryggingasjóðs getur lækkað um 230 millj. þar sem dregið hefur úr atvinnuleysi. Vextir lækka einnig um 300 millj. kr. til viðbótar við áætlun um 900 millj. kr. lækkun í fjárlagafrv. 1999 frá fjárlagafrv. 1998.
Endurskoðuð þjóðhagsspá fyrir árið 1999 felur í sér nokkrar breytingar frá forsendum fjárlagafrv. Hagvöxtur er talinn verða tæplega 0,5% meiri en áður. Það má fyrst og fremst rekja til aukinna þjóðarútgjalda, jafnt neyslu sem fjárfestingar. Kaupmáttur heimilanna verður einnig meiri þrátt fyrir að verðbólga hækki lítils háttar frá fyrri spá. Útflutningur eykst hins vegar minna á næsta ári en áður var spáð og halli á viðskiptajöfnuði verður því heldur meiri á næsta ári. Samanlagður hallinn árin 1998 og 1999 er þó talinn verða óbreyttur frá fyrri spám.
Heildarsala eigna er áætluð 8,3 milljarðar kr. í fjárlögum næsta árs. Það er aukning um 1,3 milljarða kr. frá fjárlagafrv. Sú aukning skýrist fyrst og fremst af auknum söluhagnaði og breyttri tímasetningu á sölu eigna. Áformað er að selja hlut ríkisins í Fjárfestingarbankanum og afganginn af söluhlut ríkisins í Íslenskum aðalverktökum.
Nú vil ég fjalla um skýringar á breytingartillögum. Fyrst vík ég að skýringum á brtt. við 5. gr. frv.:
Lántökuheimild ríkissjóðs lækkar úr 11.600 millj. kr. í 2.000 millj. kr. í kjölfar endurmats á lánahreyfingum ríkissjóðs og vegna góðrar sjóðstöðu í árslok 1998. Einkum er þrennt sem skýrir bætta stöðu í árslok 1998. Í fyrsta lagi hefur ríkissjóður ekki greitt eins mikið niður af erlendum skammtímalánum á síðustu mánuðum og ráðgert var vegna áhrifa á gjaldeyrisstöðu. Í öðru lagi greiddi Landsvirkjun upp lán frá ríkissjóði fyrir gjalddaga að upphæð 3,5 milljarðar kr. í október. Loks hefur handbært fé frá rekstri verið nokkru meira en en áætlanir gerðu ráð fyrir á síðustu mánuðum ársins. Styrk staða ríkissjóðs í árslok gerir þannig kleift að ganga á sjóði á næsta ári auk þess sem tekjuafgangur hefur aukist frá fjárlagafrumvarpi og minnka því langtímalántökur á næsta ári.
Lögð er til ein breyting á 2. tölul., þ.e. að lántökuheimild Lánasjóðs íslenskra námsmanna lækki um 400 millj. kr. og verði 3.100 millj. kr. í stað 3.500 millj. kr. Lækkunin stafar af minni fjármagnsgjöldum og minni afborgunum sjóðsins af langtímalánum en áætlað var í frumvarpi til fjárlaga.
Lagðar eru til þrjár breytingar á 3. tölul. 5. gr.:
1. Lagt er til að lántökuheimild Íbúðalánasjóðs, húsbréfadeildar hækki um 700 millj. kr. og verði 23.320 millj. kr. Samkvæmt endurskoðuðum áætlunum sjóðsins er gert ráð fyrir að útgáfa húsbréfa verði 700 millj. kr. meiri en samkvæmt fjárlagafrumvarpi.
2. Lagt er til að viðbótarlán Íbúðalánasjóðs verði 1.140 millj. kr. eða 220 millj. kr. hærri en áætlað var. Er endurskoðuð áætlun byggð á upplýsingum frá sveitarfélögunum um fjölda lána. Er nú gert ráð fyrir að lán verði veitt til 927 íbúða eða 147 íbúðum fleiri en í fyrri áætlun.
3. Lagt er til að við bætist nýr liður með heimild til handa Hitaveitu Suðurnesja til að taka allt að 1.000 millj. kr. að láni árið 1999. Er lántakan fyrst og fremst ætluð til að fjármagna endurbyggingu elsta hluta orkuversins. Nauðsynlegt er talið að ríkissjóður veiti heimild til lántökunnar þar sem ríkið á 20% eignarhlut í sameignarfélaginu og ber ábyrgð í samræmi við það.
Ef ég vík síðan að brtt. meiri hluta nefndarinnar við A-hluta fjárlaga þá er fyrst til að taka hjá æðstu stjórn ríkisins að gert er ráð fyrir framkvæmdum á Alþingisreit upp á 70 millj. kr., til byggingar á þjónustuskála við Alþingishúsið. Heildarkostnaður við verkið er áætlaður 400 millj. kr.
Forsrn. Gerð er tillaga um 20 millj. kr. til byggingar stafkirkju í Vestmannaeyjum. Ég hef áður gert grein fyrir því verkefni.
Gert er ráð fyrir 300 millj. kr. framlagi til Byggðastofnunar. Ég hef jafnframt gert grein fyrir því verkefni áður. Kveðið er á um slík eignarhaldsfélög sem ætlunin er að koma á fót í reglugerð um Byggðastofnun frá 8. maí 1998 og þar eru sett tiltekin skilyrði fyrir þátttöku stofnunarinnar í þeim.
Menntmrn. Farið er fram á 7 millj. kr. fjárveitingu Háskólans á Akureyri vegna rekstrarkostnaðar við fjarkennslu.
Undir liðnum Framhaldsskólar er lagt til að framlag til stofnkostnaðar hækki um 20 millj. kr. til endurbóta á húsnæði Sjómannaskólans og 5 millj. kr. framlag til byggingarframkvæmda við Framhaldsskóla Vestfjarða.
Síðan er lagt til að almenn framlög til framhaldsskóla hækki um 40 millj. kr. Ég hef áður gert grein fyrir því.
Gert er ráð fyrir að jöfnun á námskostnaði hækki um 40 millj. kr. Þeirri upphæð verður varið til hækkaðra styrkveitinga eins og ég hef áður gert grein fyrir.
Tillaga er um að framlag til háskólabókasafnsins hækki um 10 millj. kr. vegna aukins rekstrarkostnaðar.
Lögð er til 3 millj. kr. hækkun á framlagi til Listasafns Íslands vegna lægri sértekna en gert er ráð fyrir í fjárlögum.
Gerð er tillaga um nýtt viðfangsefni undir liðnum Menningarstofnanir, viðhald og stofnkostnaður. Framlag til Kaupangurs á Vopnafirði upp á 5 millj. kr., styrkur til viðgerða á húsinu sem er 100 ára gamalt verslunar- og íbúðarhús sem talið er hafa gildi fyrir byggingarlist í landinu og byggingartæknilega þróun.
Farið er fram á 4,7 millj. kr. hækkun á framlagi til Sinfóníuhljómsveitar Íslands til að fjölga hljóðfæraleikurum í strengjasveit.
Lagt er til að framlag til Kvikmyndasjóðs hækki um 30 millj. til að ná markmiðum samkomulags sem menntmrh. og fjmrh. fyrirhuga að gera við innlenda kvikmyndaframleiðendur um eflingu Kvikmyndasjóðs á næstu árum.
Lagt er til að framlag til óskipts viðfangsefnis, Listir, framlög, hækki um 2 millj. kr. til að auka svigrúm til styrkveitinga á þessum lið, en menntmrn. hefur annast úthlutun undir þessum lið.
Gert er ráð fyrir 3 millj. kr. hækkun undir liðnum Norræn samvinna vegna Norræna félagsins.
Gert er ráð fyrir að framlag til Ungmennafélags Íslands hækki um 5 millj. kr. vegna undirbúnings fyrir norrænt menningarmót árið 2000 og gerður verði samningur um þátttöku ríkissjóðs í verkefninu.
Lögð er til 0,3 millj. kr. hækkun á viðfangsefninu Íþróttir aldraðra.
Óskað er eftir 3 millj. kr. hækkun á fjárveitingum til Snorrastofu í Reykholti til fasteignakaupa.
Utanrrn. Gerð er tillaga um að hækka framlag til Útflutningsráðs um 20 millj. kr. Í fyrirhuguðum lagabreytingum er gert ráð fyrir breytingum á markaðsgjaldi og hafa þær m.a. í för með sér 20 millj. kr. hærri tekjur en áætlað var í frumvarpi til fjárlaga fyrir næsta ár. Tekjur þessar renna í ríkissjóð en samsvarandi fjárhæð er ráðstafað til Útflutningsráðs.
Hérðasskógar. Lögð er til 5 millj. kr. hækkun á fjárframlögum til að stækka skógræktarsvæðið á Fljótsdalshéraði til norðurs.
Lögð er til 3 millj. kr. hækkun til Jarðasjóðs og Jarðeigna ríkisins vegna endurskipulagningar í rekstri og nýrrar löggjafar um sjóðinn.
Gerð er tillaga um sérstakar greiðslur í landbúnaði upp á 7,5 millj. kr. tímabundna fjárveitingu til að kosta slátrun 1.600 hrossa og sporna þannig við ofbeit.
Undir dóms- og kirkjumrn. er lagt til að veitt verði 2,4 millj. kr. tímabundið framlag til rannsóknar á viðurlögum við afbrotum og þróun þeirra. Rannsóknin varðar dóma vegna líkamsmeiðinga, kynferðisafbrota og fíkniefnabrota.
Héraðsdómstólar. Lagt er til að launagjöld héraðsdómstóla verði hækkuð um 11,4 millj. kr. vegna úrskurðar Kjaradóms um laun dómstjóra og héraðsdómara sem gildir frá 1. júlí 1998. Sambærileg tillaga er gerð við 3. umr. frumvarps til fjáraukalaga fyrir árið 1998. Jafnframt er lagt til að dómstólaráð fái 12 millj. kr. fjárveitingu til tölvubúnaðar héraðsdómstóla og upplýsingakerfis.
Gerð er tillaga um 3 millj. kr. hækkun launagjalda vegna starfs lögfræðings hjá Útlendingaeftirlitinu en verkefni hafa aukist við undirbúning Schengen-samkomulags auk þess sem einstaklingum sem leita eftir pólitísku hæli á Íslandi hefur fjölgað.
Schengen-samstarf. Lagt er til að framlag til tækja og búnaðar verði hækkað um 72,2 millj. kr. vegna kostnaðar við upplýsingakerfi fyrir Schengen. Kostnaður Íslands við sameiginlegt útboð Norðurlanda á upplýsingakerfunum nemur 82,2 millj. kr. Að auki bætist við kostnaður innan lands vegna aðlögunar á hugbúnaði og kaupa á vélbúnaði. Er sá kostnaður metinn 40--60 millj. kr. og kemur um helmingur hans til greiðslu á næsta ári. Hér er reiknað með að 20 millj. kr. falli til á næsta ári. Á móti framangreindum kostnaðarauka koma 20 millj. kr. vegna uppsafnaðra heimilda áranna 1997--98 og á næsta ári er þegar áætlað fyrir 10 millj. kr. á þessum lið. Alls er því lögð til hækkun að fjárhæð 72,2 millj. kr.
Gerð er tillaga um 2,5 millj. kr. hækkun til sýslumannsembættisins á Blönduósi til að styrkja löggæslu í umdæminu.
Húsnæði og búnaður sýslumanna. Gerð er tillaga um 5 millj. kr. hækkun á liðnum til kaupa á tækjum og búnaði.
Biskup Íslands. Gerð er tillaga um 12 millj. kr. framlag til Hólanefndar til byggingar Auðunarstofu á Hólum í Hjaltadal.
Félmrn. Þar er lögð til 1 millj. kr. hækkun til aðalskrifstofu vegna stofnunar fjölskylduráðs til viðbótar við 2 millj. kr. fjárveitingu sem áður var komin inn í fjárlagafrv.
Gerð er tillaga um 4 millj. kr. til Jafnréttisráðs vegna launakostnaðar og 2 millj. kr. vegna þáltill. um aðgerðir til að auka hlut kvenna í stjórnmálum og sérstakrar nefndar sem skipuð var í því skyni.
Barnaverndarstofa. Lagt er til að framlag til viðfangsefnisins Heimili fyrir börn og unglinga verði lækkað um 8 millj. kr. Við 2. umr. fjárlaga fyrir árið 1999 var veitt fé til Krossgatna. Fjárhæð þessi er nú millifærð á fjárlagalið 999 Félagsmál, ýmis starfsemi á nýtt viðfangsefni, Krossgötur. Hér er um millifærslu að ræða en ekki lækkun til verkefnisins.
Þá er gert ráð fyrir 67 millj. kr. hækkun framlags til fatlaðra. Hún er þríþætt: Í fyrsta lagi 60 millj. kr. og hef ég gert grein fyrir þeirri hækkun áður í ræðu minni.
Þá er lagt til að handverkstæðið Ásgarður, sem er verndaður vinnustaður fyrir fatlaða að Lækjarbotnum í Reykjavík, fái 5 millj. kr. tímabundna fjárveitingu til að breyta húsi sem það fékk að gjöf í vor og reisa viðbyggingu fyrir starfsemi sína.
Loks er farið fram á sérstaka tímabundna fjárveitingu til viðfangsefnaliðar 1.90 Ýmis verkefni að fjárhæð 2 millj. kr. til að styrkja fjölskyldu til að annast tvö alvarlega veik börn sín.
Styrktarfélag vangefinna. Gerð er tillaga um 10 millj. kr. hækkun fjárveitinga til þriggja dagvistunarstofnana. Í fyrsta lagi er lögð til 3 millj. kr. hækkun til viðfangsefnisins 1.60 Dagvistun Lækjarási, í öðru lagi 3 millj. kr. hækkun til viðfangsefnisins 1.61 Dagvistun Bjarkarási og loks 4 millj. kr. hækkun á framlagi til viðfangsefnisins 1.62 Dagvistun Lyngási.
Framlag til Jöfnunarsjóðs sveitarfélaga hækkar um 20 millj. kr. í kjölfar endurskoðunar á tekjum ríkissjóðs fyrir árið 1999.
Í fjárlagafrv. fyrir árið 1999 er í útgjöldum Atvinnuleysistryggingasjóðs gert ráð fyrir tæplega 3% atvinnuleysi. Í ljósi spár Þjóðhagsstofnunar um 2,5% atvinnuleysi á næsta ári er lagt til að útgjöld vegna atvinnuleysisbóta lækki um 230 millj. kr. Í frumvarpi til fjárlaga var gert ráð fyrir að atvinnutryggingagjald lækkaði úr 1,15% í 1% af gjaldstofni. Nú hefur verið horfið frá því og verður gjaldið óbreytt. Þá hafa spár um stofn atvinnutryggingagjalds verið endurmetnar. Tekjur af atvinnutryggingagjaldi verða því um 500 millj. kr. hærri en áætlað var í frumvarpinu og breytist tekjuáætlun fjárlaga samsvarandi. Miðað við spá um atvinnuleysi og áætlaðar tekjur af atvinnutryggingagjaldi myndast um 700 millj. kr. inneign Atvinnuleysistryggingasjóðs hjá ríkissjóði á næsta ári. Er það í samræmi við áform um að sjóðurinn byggi upp eignir þegar vel árar og gangi á þær ef atvinnuleysi eykst. Þannig mun sjóðurinn virka til jöfnunar á sveiflum í atvinnulífinu.
Félagsmál, ýmis starfsemi. Gerð er tillaga um 15,7 millj. kr. hækkun á fjárveitingum til þessa liðar. Gert er ráð fyrir nýju viðfangsefni, Krossgötur, endurhæfingarheimili, eins og ég hef gert grein fyrir áður, og er millifært framlag til þeirra af fjárlagalið 400 Barnaverndarstofa.
Þá er gerð tillaga um 5 millj. kr. hækkun á viðfangsefninu Ýmis framlög, og er þar um tímabundna fjárveitingu að ræða til Súðavíkurhrepps.
Í þriðja lagi er óskað eftir að meðferðarheimilið Byrgið fái 2 millj. kr. fjárveitingu til reksturs.
Að lokum er lögð til 0,7 millj. kr. hækkun á viðfangsefninu Félagasamtök, styrkir og er gert ráð fyrir að framlagið renni til Landssambands aldraðra. Þá lækkar framlag til Blindrafélagsins um 1,5 millj. kr. Það er millifærsla en ekki lækkun og við það hækkar óskipt fjárhæð jafnmikið.
Heilbr.- og trmrn. Gerð er tillaga um 8 millj. kr. hækkun framlags til Tryggingastofnunar ríkisins. Er það vegna þess að Lífeyrissjóður starfsmanna ríkisins flutti starfsemi sína frá Tryggingastofnun fyrr á þessu ári og er þetta til að mæta sameiginlegum kostnaði sem hann tók þátt í áður. Kostnaður Tryggingastofnunar vegna brotthvarfs lífeyrissjóðsins nemur 10 millj. kr. á ári.
Þá er liðurinn Bætur samkvæmt lögum um félagslega aðstoð. Vegna endurskoðunar á áætlun Tryggingastofnunar ríkisins byggðri á útgjöldum janúar til október 1998 og áforma um að bætur hækki um 4% í stað 3,65% frá 1. jan. 1999 eru eftirfarandi breytingar lagðar til: Framlag til umönnunarbóta hækki um 20 millj. kr., ekkju- og ekkilsbætur lækki um 10 millj. kr., heimilisuppbætur hækki um 10 millj. kr., sérstök heimilisuppbót lækki um 5 millj. kr. og uppbætur lækki um 65 millj. kr.
Gerð er tillaga um hækkun á liðnum Lífeyristryggingar sem nemur alls 360 millj. kr.
Í fyrsta lagi er gert ráð fyrir að framlag til tekjutryggingar ellilífeyrisþega hækki alls um 150 millj. kr. og eru skýringar á því af tvennum toga. Annars vegar er farið fram á 210 millj. kr. hækkun á framlögum. Er það í samræmi við áform um talsverða hækkun á frítekjumörkum ellilífeyrisþega sem ætlað er að draga úr þeim áhrifum sem tekjur maka hafa á bótagreiðslur. Þannig er ráðgert að frítekjumörk hjóna sem bæði eru ellilífeyrisþegar hækki úr 28.156 kr. á mánuði í 40.224 kr. Er þá því marki náð að frítekjumark hjóna er það sama og tveggja einhleypinga með ellilífeyri, en það er 30% lægra nú. Einnig er gert ráð fyrir að frítekjumark annars hjóna sem er ellilífeyrisþegi hækki úr 20.112 kr. á mánuði í 30.168 kr. þannig að það njóti 50% hærri frítekjumarka en einhleypur vegna hærri fjölskyldutekna. Frítekjumörk vegna tekna úr lífeyrissjóðum eru óbreytt. Með breytingunum er stefnt að því að draga úr skerðingu bóta vegna tekna maka þannig að lífeyrisþegar haldi eftir meira af sjálfsaflatekjum sínum en áður var. Hins vegar er farið fram á 60 millj. kr. lækkun vegna endurskoðaðrar áætlunar Tryggingastofnunar ríkisins byggðri á útgjöldum janúar til október 1998 og áforma um að bætur hækki um 4% í stað 3,65% frá 1. janúar 1999.
Þá er lögð er til breyting á framlögum til tekjutryggingar sem nemur alls 170 millj. kr. og er hún einnig af tvennum toga. Annars vegar er lögð til 190 millj. kr. hækkun á framlögum og er það í samræmi við áform um mikla hækkun á frítekjumörkum örorkulífeyrisþega sem ætlað er að draga úr þeim áhrifum sem tekjur maka hafa á bótagreiðslur. Einnig er lögð til hækkun á frítekjumarki einhleypinga sem eru öryrkjar en sérstök frítekjumörk vegna tekna úr lífeyrissjóðum eru felld inn í almenn frítekjumörk örorkulífeyrisþega. Þannig hækka frítekjumörk hjóna sem bæði eru örorkulífeyrisþegar úr 14.178 kr. á mánuði í 30.168 kr. Frítekjumark einhleypinga sem eru öryrkjar hækkar úr 20.112 kr. í 30.168 kr. á mánuði. Einnig er gert ráð fyrir að frítekjumark annars hjóna sem er örorkulífeyrisþegi hækki úr 20.112 kr. á mánuði í 45.252 kr. þannig að það njóti 50% hærri frítekjumarka en einhleypur vegna hærri fjölskyldutekna. Með breytingunum er að því stefnt að lífeyrisþegar haldi eftir meira af sjálfsaflatekjum sínum en áður. Samtals er áætlað að breytingin kosti 190 millj. kr. á ári og er farið fram á aukna fjárheimild sem því nemur. Hins vegar er farið fram á 20 millj. kr. lækkun vegna endurskoðaðrar áætlunar Tryggingastofnunar ríkisins byggðrar á útgjöldum janúar til október 1998 og áforma um að bætur hækki um 4% í stað 3,65% frá 1. janúar 1999.
Til viðbótar þessu eru lagðar til nokkrar breytingar vegna endurskoðunar á áætlun Tryggingastofnunar ríkisins byggðri á útgjöldum janúar til október 1998 og áforma um að bætur hækki um 4% í stað 3,65% frá 1. janúar 1999. Þannig er lagt til að framlag til ellilífeyris hækki um 70 millj. kr., framlag til örorkustyrks lækki um 10 millj. kr., barnalífeyrir lækki um 15 millj. kr., framlag til fæðingarorlofs lækki um 15 millj. kr. og loks hækki framlag til óskipts liðar, 1.91 Annað um 10 millj. kr.
Lögð er til 11,1% hækkun á framlagi til sjúkratrygginga vegna endurskoðunar á áætlun um lækniskostnað.
Gerð er tillaga um 1,5 millj. kr. fjárveitingu til að hægt sé að ráða félagsráðgjafa við Sjónstöð Íslands. Á móti lækkar fjárveiting til Blindrafélagsins en það hefur ekki áhrif heildarfjárhæð þess liðar þar sem óskipt fjárhæð hans hækkar jafnmikið en ráðning félagsráðgjafa er undir þessum lið.
Lagt er til að veittar verði 25 millj. kr. til tækjakaupa á Fjórðungssjúkrahúsinu á Akureyri.
Lagt er til að framlag til bygginga sjúkrahúsa, heilsugæslustöðva og læknisbústaða hækki um 12 millj. kr. Fjárhæðin skiptist á eftirfarandi hátt: Til Sjúkrahúss Suðurlands eru veittar 4 millj. kr. til að gera nýtingaráætlun fyrir sjúkrahúsið og kanna hvort heppilegt sé að byggja við það álmu í stað hjúkrunarheimilisins Ljósheima og láta fara fram áætlunargerð í framhaldi af því í samræmi við lög um skipan opinberra framkvæmda. Til sjúkrahússins á Hólmavík eru veittar 4 millj. kr. til endurbóta og til Sjúkrahúss Sauðárkróks eru veittar 4 millj. kr. vegna þátttöku ríkissjóðs í kostnaði við endurhæfingardeild.
Farið er fram á 305,9 millj. kr. til hækkunar á liðnum Heilbrigðismál, ýmis starfsemi. Í fyrsta lagi er lagt til að veitt verði 251,9 millj. kr. framlag til að mæta áhrifum af nýlegum aðlögunarsamningum sem gerðir hafa verið við ýmis félög háskólamenntaðra starfsmanna á heilbrigðisstofnunum, svo sem meinatækna, röntgentækna, líffræðinga, sjúkraþjálfara o.fl., umfram það sem þegar hefur verið gert ráð fyrir í fjárlagafrumvarpi. Sundurliðun framlagsins á einstakar stofnanir er sýnd í sérstöku yfirliti I með breytingartillögum.
Þá er lagt til að fjárveiting liðarins verði hækkuð um 44,9 millj. kr. í kjölfar endurmats á launakostnaði heilbrigðisstofnana vegna úrskurðar kjaranefndar um laun heilsugæslulækna. Við gerð mats sem lagt var til grundvallar í fjárlagafrumvarpi 1999 lágu ekki nægilega skýrt fyrir forsendur um aukna þörf fyrir afleysingar sem leiðir af auknum rétti heilsugæslulækna til vaktafría. Þær forsendur hafa nú verið endurskoðaðar. Þá hefur kjaranefnd breytt viðmiðunum í fyrri úrskurði um einingagreiðslur með tilliti til fjölda íbúa á hvern lækni. Sundurliðun fjárveitingarinnar á einstakar stofnanir er sýnd í sérstöku yfirliti III með breytingartillögum.
Loks er gerð tillaga um 9,1 millj. kr. fjárveitingu sem skipt verði á milli hjúkrunarheimila og daggjaldastofnana í samræmi við sundurliðun í sérstöku yfirliti II með breytingartillögum. Hækkunin er ætluð til að mæta endurmati á áhrifum af kjarasamningum lækna umfram það sem þegar hefur verið gert ráð fyrir í fjárlagafrumvarpi. Aukningin samkvæmt endurmatinu er almennt minni háttar þar sem vægi launagreiðslna til lækna er fremur lágt í heildarlaunagjöldum þessara stofnana. Sambærilegar tillögur eru gerðar við 3. umræðu frumvarps til fjáraukalaga fyrir árið 1998.
Heilsugæslustöðin Mosfellsbæ. Gerð er tillaga um að hækka fjárveitingu til hennar um 2 millj. til að fjölga starfsfólki í heimahjúkrun.
Þá er komið að fjmrn. Þar er gert ráð fyrir að veittar verði 5 millj. kr. til ríkisskattstjóra til að undirbúa breytingar á framtals- og álagningarkerfum sem notuð eru við skattheimtu ríkisins.
Farið er fram á 5 millj. kr. hækkun til skatta- og tollamála til að gera sérstakt þjónustuátak í skattkerfinu og ráða mann til að skipuleggja og koma á þjónustu á skattstofunum með það fyrir augum að veita skattborgurum sem bestar upplýsingar um skatta, leiðbeina þeim um rétt þeirra og veita þeim leiðsögn um málsmeðferð.
Óskað er eftir 110 millj. kr. hækkun á liðnum Útgjöld samkvæmt heimildarákvæðum. Annars vegar er lagt til að framlög vegna kostnaðar við heimildarákvæði skv. 7. gr. fjárlaga hækki um 80 millj. kr. Áformað er að framlaginu verði ráðstafað til verkefna á sviði atvinnuþróunar og nýsköpunar í atvinnulífinu á svæðum sem ekki njóta góðs af stóriðju. Hins vegar er farið er fram á 30 millj. kr. viðbótarframlag til að mæta kostnaði við ýmis tilefni til ráðstafana samkvæmt heimildarákvæðum fjárlagafrumvarpsins sem gerð er grein fyrir í 7. gr. fjárlaganna.
Gerð er tillaga um að fjárheimild liðarins Launa- og verðlagsmál verði hækkuð um 100 millj. kr. til að mæta ýmiss konar endurmati á launaútgjöldum stofnana sem eftir er að ganga frá og ýmsum ófyrirséðum breytingum sem kunna að verða á launakjörum á árinu, m.a. vegna nýrra úrskurða kjaranefndar.
Undir Vegagerðinni er lagt til að styrkir til sérleyfishafa hækki um 34 millj. kr. Hér er ekki um útgjaldaaukningu að ræða þar sem felld eru brott úr lögum um fjáröflun til vegagerðar ákvæði um endurgreiðslur til sérleyfishafa. Við þá lagabreytingu hækka tekjur af þungaskatti um samsvarandi upphæð. Gert er ráð fyrir að Vegagerðin annist úthlutun umræddra styrkja með tilliti til aksturs og stöðu einstakra sérleiða í samgöngukerfinu.
Óskað er eftir 26,6 millj. kr. hækkun til Siglingastofnunar Íslands og er hún af þrennum toga. Að framlag hækki um 9,6 millj. kr. til samræmis við hafnaáætlun. Við vinnslu frumvarps til fjárlaga fyrir árið 1999 lá tillaga til þingsályktunar um hafnaáætlun ekki fyrir. Samkvæmt framlagðri áætlun sem nú liggur fyrir eiga framkvæmdir að vera 9,6 millj. kr. hærri.
Þá er gerð tillaga um 9 millj. kr. hækkun á fjárveitingu til Hafnabótasjóðs vegna niðurfellingar á skuldum hafnarsjóðs Breiðdalshrepps.
Loks er farið fram á 8 millj. kr. hækkun framlaga vegna fyrirsjáanlegrar lækkunar sértekna. Þegar níu mánaða uppgjör stofnunarinnar 1998 er athugað bendir margt til þess að tekjur verði nokkru lægri en ráð var fyrir gert og virðist ástæðan einkum veruleg aukning stjórnvaldsverkefna sem fjármögnuð eru af fjárlögum og stofnunin hefur ekki tekjur af.
Flugmálastjórn. Farið er fram á að framlag til rekstrar Flugmálastjórnar hækki um 6,9 millj. kr. vegna endurmats á hækkun lífeyrisiðgjaldagreiðslna, en ég hef áður gert grein fyrir ástæðum þess við umræður um fjáraukalög, og sömuleiðis um hækkun á um 11 millj. kr. til flugvalla. Hún er af sömu ástæðum. Ég gerði grein fyrir þessu í framsögu minni um frv. til fjáraukalaga áðan.
Gerð er tillaga um að niðurgreiðsla á rafhitun hækki um 100 millj. kr.
Gert er ráð fyrir að framlag til Neytendasamtakanna hækki um 2 millj. kr., en nú liggur fyrir þjónustusamningur um verkefni á sviði neytendamála og það framlag er til að standa straum af honum.
Umhverfisráðuneyti. Lögð er til 2,2 millj. kr. hækkun fjárveitingar til rannsókna á botndýrum á Íslandsmiðum.
Gerð er tillaga um að framlag til Landmælinga Íslands hækki um 2,2 millj. kr. Alls hækka útgjöld um 15 millj. kr. vegna stafrænnar kortagerðar en á móti hækka sértekjur um 12,8 millj. kr.
Farið er fram á 11,5 millj. kr. hækkun framlags til Veðurstofunnar. Annars vegar er lagt til að framlög til stofnkostnaðar hækki um 10 millj. kr. til kaupa og leigu á nýjum jarðskjálftamælum og nauðsynlegum tækjabúnaði þeim tengdum. Vegna tíðra jarðskjálfta á Suðvesturlandi nýverið þykir ástæða til að fylgjast nánar með jarðskorpunni með eflingu rannsókna. Fyrirhugað er að rannsaka spennubreytingar og hnik í jarðskorpunni á Reykjanesskaga og austur í Ölfus. Til viðbótar stofnkostnaðinum er einnig lagt til að framlag til reksturs hækki um 1,5 millj. kr. Er tillagan í samræmi við niðurstöður álitsgerðar fjögurra sérfræðinga sem tilnefndir voru af vísindamannaráði Almannavarna.
Hins vegar er lagt til að framlög til reksturs hækki um 1,5 millj. kr. vegna reksturs og úrvinnslu upplýsinga úr nýjum jarðskjálftamælum á Suðvesturlandi og í nágrenni höfuðborgarinnar.
Þá er gerð tillaga um að vaxtagjöld ríkissjóðs lækki um 300 millj. kr. en greiddir vextir um 700 millj. kr. í samræmi við endurskoðaða áætlun um þróun þessara útgjalda.
Þá eru skýringar við brtt. við sundurliðun í B-hluta.
Framlag til Ríkisútvarpsins hækkar um 80 millj. kr. og rekstrargjöld um sömu fjárhæð vegna hækkunar afnotagjalda sem ég hef áður minnst á.
Framlag ríkisins til Sinfóníuhljómsveitar Íslands var hækkað um 5,2 millj. kr. við 2. umræðu. Ég hef áður gert grein fyrir þeirri hækkun og einnig hækkun um 4,7 millj. kr. en áætlað er að þessi breyting leiði til þess að rekstrargjöld hljómsveitarinnar aukist samtals um 20,4 millj. kr. og er þá miðað við að hljómsveitin afli sjálf 2,7 millj. kr. meiri tekna og að framlag annarra rekstraraðila en ríkisins hækki um 7,8 millj. kr. á móti 9,9 millj. kr. hækkun ríkisframlagsins.
Þá er leiðrétting á framlagi til Flugstöðvar Leifs Eiríkssonar til hækkunar um 13 millj. kr. og verður þá 146 millj. kr. Framlagið samanstendur af 91 millj. kr. frá Flugmálastjórn á Keflavíkurflugvelli og 55 millj. kr. af flugmálaáætlun á fjárlagalið 10-472-6.91 Framlag til framkvæmda við Flugstöð Leifs Eiríkssonar. Lagt er til að mismuninum, 13 millj. kr., verði varið til að greiða niður lán örar en gert var ráð fyrir áður.
Áætlun Áfengis- og tóbaksverslunar ríkisins hefur verið endurskoðuð. Í endurskoðaðri áætlun, sem byggir á sölutölum fyrstu 11 mánuða líðandi árs, er gert ráð fyrir að tekjur hækki nokkuð frá fyrri áætlun eða um 446 millj. kr. eða 4,4%. Jafnframt er áætlað að rekstrargjöld hækki um 346 millj. kr. Þar af eru 309 millj. kr. vegna vörunotkunar, 15 millj. kr. vegna aukinna greiðslna í Lífeyrissjóð starfsmanna ríkisins og 22 millj. kr. vegna nýrra áfengisútsala, í Mosfellsbæ, á Dalvík, á Þórshöfn og í Grindavík. Þá eykst fjárfesting um 20 millj. kr. vegna nýrra verslana og endurnýjunar á tölvukerfi. Gert er ráð fyrir að greiðslur fyrirtækisins í ríkissjóð aukist um 82 millj. kr. frá fjárlagafrumvarpi og verði 2.908 millj. kr. Þar af eru 2.647 millj. kr. magnálagning en afgangurinn, 261 millj. kr., er arður af eigin fé.
Þá er komið að Rafmagnsveitum ríkisins. Í endurskoðaðri áætlun um rekstur Rafmagnsveitna ríkisins er miðað við að ríkissjóður dragi úr samningsbundinni 194 millj. kr. arðkröfu á árinu 1999 um 44 millj. kr. til þess að auka rannsóknar- og þróunarstarf hjá fyrirtækinu, m.a. jarðhitaleit á köldum svæðum. Samkvæmt þessu verður arðgreiðsla til ríkissjóðs 150 millj. kr. og greiðir ríkissjóður fyrirtækinu sömu fjárhæð til baka. Þar af verður 139 millj. kr. ráðstafað til styrkingar dreifikerfis í sveitum og 11 millj. kr. til rannsóknar- og þróunarverkefna.
Þá eru skýringar við brtt. í C-hluta. Þar er fyrst á blaði Byggðastofnun. Þar hækkar framlag um 300 millj. kr. Ég hef gert grein fyrir þeirri hækkun áður. Í reglugerð um Byggðastofnun verður kveðið á um að þátttaka Byggðastofnunar nemi mest 40% af hlutafé í viðkomandi eignarhaldsfélagi.
Áætlun Lánasjóðs íslenskra námsmanna hefur verið endurskoðuð. Samkvæmt endurskoðaðri áætlun verða fjármagnsgjöld 1.930 millj. kr. sem er 170 millj. kr. minna en gert var ráð fyrir í fjárlagafrumvarpi. Jafnframt er áætlað að afborganir af löngum lánum verði um 2.200 millj. kr. sem er 200 millj. kr. lækkun frá fyrri áætlun. Þetta leiðir til þess að fyrirhugaðar lántökur minnka um 400 millj. kr. og verða þá 3.100 millj. kr. á árinu 1999. Önnur rekstrargjöld sjóðsins hækka um 17 millj. kr. og verða 232 millj. kr. Breyting skýrist í fyrsta lagi af 21 millj. kr. auknum kostnaði við rekstur skrifstofu og málskotsnefnd sem er áætlaður alls 159 millj. kr. á næsta ári. Í öðru lagi er gert ráð fyrir 8 millj. kr. minni útgjöldum vegna vaxtastyrks sem er áætlað að nemi samtals 50 millj. kr. og að lokum er 4 millj. kr. hækkun á ríkisábyrgðargjaldi sem talið er nema 23 millj. kr. á næsta ári. Þá er áætlað fyrir 7 millj. kr. til viðbótar við þær 16 millj. kr. sem eru fyrir til fjárfestingar í tölvukerfi. Framangreindar breytingar hafa ekki áhrif á framlag ríkisins sem er 57,6% af áætluðum útlánum sjóðsins eða 1.810 millj. kr. á árinu 1999.
Í áætlun um rekstur Lánasjóðs landbúnaðarins eru aðrar rekstrartekjur taldar nema 157 millj. kr. Hið rétta er að sjóðurinn verður á árinu 1999 fjármagnaður með 147 millj. kr. framlagi til rekstrar úr ríkissjóði auk þess sem áætlað er að hann afli sjálfur 10 millj. kr. tekna. Áætlun um sjóðinn er leiðrétt til samræmis við þetta.
Íbúðalánasjóður, húsbréfadeild. Samkvæmt upplýsingum frá sjóðnum verða húsbréfalán 700 millj. kr. meiri en gert var ráð fyrir í áætlun fyrir húsbréfadeild Íbúðalánasjóðs í frv. til fjárlaga fyrir árið 1999 og verður nýjum lánveitingum mætt með því að gefa út húsbréf.
Íbúðalánasjóður, viðbótarlán. Veitt lán aukast um 120 millj. kr. frá áætlun í ljósi nýrra upplýsinga frá sveitarfélögunum að veita þurfi lán vegna 927 íbúða sem er fjölgun um 147 íbúðir frá fyrri áætlun. Áformað er að lánveitingar verði fjármagnaðar með sölu húsnæðisbréfa. Þá er áætlað að fjármunatekjur og fjármagnsgjöld aukist um 10 millj. kr. vegna aukinna lánveitinga og er gert ráð fyrir að útlánsvextir ráðist af þeim vöxtum sem standa sjóðnum til boða.
Íbúðalánasjóður, byggingarsjóðir ríkisins og verkamanna. Samkvæmt endurskoðuðum áætlunum sjóðsins verða afborganir af veittum lánum 250 millj. kr. meiri en áætlað var í frv. til fjárlaga fyrir árið 1999. Áætlað er að afborganir af teknum lánum hækki um sömu fjárhæð og hefur breytingin því ekki áhrif á greiðslustöðu sjóðsins.
Ég hef lokið við að gera grein fyrir þeim brtt. sem fluttar eru við fjárlögin. Fyrir liggja tillögur um breytingar á 7. gr. á þskj. 555. Ég mun ekki fara yfir þær sérstaklega í framsögu minni en get komið að einstökum þáttum þeirra ef tilefni gefst til síðar. Einnig flyt ég ásamt hv. þm. Sturlu Böðvarssyni síðbúna brtt. á þskj. 580 sem varðar íbúðir í félagslega íbúðakerfinu og veitir heimild til að semja við sveitarfélög og samtök þeirra um uppgjör vegna innlausna íbúða í félagslega íbúðakerfinu. Ekki liggur fyrir hvað þetta leiðir til mikilla útgjalda en niðurstaðan varð að veita þessa heimild á 7. gr. fjárlaga.
Ég hef nú lokið við að gera grein fyrir þeim brtt. sem meiri hluti fjárln. flytur við 3. umr. fjárlaga. Ég vil að lokum endurtaka þakkir mínar við 2. umr. til meðnefndarmanna minna, bæði í minni og meiri hluta, fyrir ágætt samstarf sem engan skugga hefur borið á milli umræðna. Eins þakka ég starfsfólki því sem hefur aðstoðað okkur á allan hátt við að ganga frá þeim viðamiklu pappírum sem fylgja þessari fjárlagagerð við báðar umræður. Það er ærið verk að koma þessu öllu heim og saman og ég vil flytja því fólki innilegar þakkir.