Ferill 106. máls. Aðrar útgáfur af skjalinu: Word Perfect.
123. löggjafarþing 1998–99.
Þskj. 520 — 106. mál.
Nefndarálit
um frv. til l. um breyt. á l. um vernd barna og ungmenna, nr. 58/1992, sbr. lög nr. 22/1995.
Frá meiri hluta félagsmálanefndar.
Nefndin hefur fjallað um málið og fengið á sinn fund Sigríði Lillý Baldursdóttur frá félagsmálaráðuneyti, Ástu S. Helgadóttur og Gunnar M. Sandholt frá Félagsmálastofnun Reykjavíkur og Einar I. Magnússon og Mörtu Bergmann frá Félagsmálastofnun Hafnarfjarðar. Þá kom Bragi Guðbrandsson frá Barnaverndarstofu á fund nefndarinnar.
Í frumvarpinu eru lagðar til breytingar á lögum um vernd barna og ungmenna vegna nýrra lögræðislaga, nr. 71/1997, þar sem sjálfræðisaldur var hækkaður úr 16 árum í 18 ár. Núgildandi lög gera nokkurn greinarmun á ákvæðum sem gilda um börn annars vegar og ungmenni hins vegar, m.a. með tilliti til þess að foreldrar fóru í tíð eldri lögræðislaga einungis með forsjá barna til 16 ára aldurs. Þykir nauðsynlegt að breyta því á þann veg að með hugtakinu börn í lögunum verði átt við einstaklinga að 18 ára aldri. Er þessi málnotkun í samræmi við ákvæði barnalaga og barnasáttmála Sameinuðu þjóðanna. Þá er í frumvarpinu gert ráð fyrir nýju ákvæði um réttindi barna við málsmeðferð þar sem réttur þeirra til að tjá sig er aukinn í samræmi við aldur og þroska. Loks er lagt til að ákvæði núgildandi laga um skipun talsmanns verði rýmkuð.
Nefndin mælir með samþykkt frumvarpsins með breytingum sem lagðar eru til í sérstöku þingskjali. Breytingarnar eru eftirfarandi:
1. Í fyrsta lagi er lagt til að orðið „vaxandi“ í b-lið 1. efnismgr. 1. gr. frumvarpsins verði fellt brott.
2. Í öðru lagi er lagt til að í c-lið 27. gr. komi fram hvaða málslið 4. mgr. breytingin nái til. Er það til að samræmi verði í texta frumvarpsins þar sem alls staðar annars staðar í frumvarpinu er vísað til málsliða þar sem það á við.
3. Þá er lagt til að 29. gr. frumvarpsins verði breytt þannig að lögð verði til sams konar breyting á fyrirsögn 54. gr. laganna og öðrum fyrirsögnum þeirra.
4. Loks er lagt til að á eftir orðunum „eða ungmenna“ í 34. gr. komi: hvarvetna.
Alþingi, 16. des. 1998.
Kristín Ástgeirsdóttir,
form., frsm.
Einar K. Guðfinnsson.
Siv Friðleifsdóttir.
Kristján Pálsson.
Magnús Stefánsson.
Guðný Guðbjörnsdóttir.
Arnbjörg Sveinsdóttir.
Rannveig Guðmundsdóttir,
með fyrirvara.