Össur Skarphéðinsson (andsvar):
Herra forseti. Ætlar yngsti ráðherra núv. ríkisstjórnar að breytast í fyrsta nátttröll hennar? Hvað hefur gerst síðan 1993 þegar Alþingi samþykkti þessi lög? Það sem hefur breyst síðan þá er að þjóðin sjálf hefur tekið málið til umræðu og afstaða þjóðarinnar liggur fyrir. Hún birtist t.d. í því að hæstv. iðnrh. tapaði þriðjungi atkvæða sinna í sínu eigin kjördæmi. Hún birtist t.d. í því að allar skoðanakannanir sem hafa farið fram um málið sýna svart á hvítu að yfirgnæfandi meiri hluti þjóðarinnar vill lögformlegt umhverfismat. Það sem hefur gerst er að málið hefur komið á dagskrá þjóðarinnar.
Þegar lögin voru samþykkt 1993 voru menn ekki að ræða þetta. Ég fullyrði að hæstv. ráðherra gæti farið og skoðað umræður þingtíðinda og hún mundi sennilega ekki finna orðið Fljótsdalsvirkjun. Það sem hefur gerst síðan er að ekki bara þessi virkjun heldur mörg önnur mál sem varða náttúruna og miðhálendi Íslands hafa komið á dagskrá. Umhverfismál eru komin á dagskrá og þau eru komin efst í forgangsröðina. Og það er, herra forseti, það sem hinn nýi, og sá sem átti að vera ferskasti ráðherrann, skilur ekki.
Umhverfismál eru ekki lengur einhver aukageta heldur eru þau forgangsatriði. Það þýðir ekki fyrir ráðherra að koma hingað á því herrans ári 1999 og segja: Í upphafi þessa áratugar höfðu menn þessa skoðun. Skoðun þjóðarinnar hefur breyst og það er þess vegna sem við erum að ræða þetta hér. Og það er þess vegna sem kominn er meiri hluti í umhvn. hins háa Alþingis fyrir því að þetta gerist.
Það er auðvitað sorglegt að fyrsta ákvörðunin sem hæstv. umhvrh. þarf að taka falli þannig að fyrir liggur að meiri hluti umhvn. er í andstöðu við hæstv. ráðherra í málinu.