Guðmundur Árni Stefánsson:
Herra forseti. Ég ætla ekki að hefja almenna umræðu um þetta mál en vil láta það koma fram að ég fagna því að það virðist ætla að komast í höfn. Ég tel um mikilvægt mál að ræða og að almennt sé vel að því staðið.
Ég vil enn fremur undirstrika þann skilning minn, sem fram kom í umræðu um þetta mál, að samkomulag hafi náðst á milli stjórnmálaflokkanna á síðasta kjörtímabili um öll meginatriði málsins, sem er að finna annars vegar í frv. til stjórnarskipunarlaga sem við erum að afgreiða nú og einnig í fylgifrv. til kosningalaga sem var að finna í frv. eins og það lá fyrir á síðasta kjörtímabili. Ég vil undirstrika þann skilning minn, sem hæstv. forsrh. hefur kvittað undir í umræðunni, að öll þau meginatriði sem þar er að finna haldi, með öðrum orðum að samkomulag milli flokkanna haldi í þeirri nefnd sem væntanlega verður sett á laggirnar á næstu dögum eða vikum.
Ég tel mjög mikilvægt að þetta komi fram við afgreiðslu málsins og vil ekki láta hjá líða að hafa það skýrt og greinilegt af minni hálfu.