[prenta uppsett í dálka] 9. fundur, 124. lþ.
Rannveig Guðmundsdóttir:
Virðulegi forseti. Fyrsta þing að afloknum alþingiskosningum er alltaf sérstakt. Nýir alþingismenn hafa bæst í hópinn og ný ríkisstjórn, að þessu sinni á gömlum grunni, hefur tekið við landstjórninni. Það er gleðiefni að þessar alþingiskosningar hafa fært okkur í átt að auknu jafnrétti hvað varðar hlutdeild kvenna á þingi og í ríkisstjórn. Ég er sannfærð um að sú þróun mun í auknu mæli breyta og móta umræðu og vinnulag á hinu háa Alþingi.
Herra forseti. Þetta þing er stutt, aðeins sex virkir dagar og við í stjórnarandstöðu höfum lagt mikla áherslu á gott samkomulag og fagleg vinnubrögð. Breytingin á stjórnarskrá um kjördæmaskipan var aðalmál þingsins og þó að mál stjórnarandstöðu hafi ekki náð fram að ganga hefur umræðan hér vakið athygli á mikilvægum málum sem skipta máli úti í þjóðfélaginu.
Ég vil þakka nýjum forseta ágæta samvinnu á þessu vorþingi. Ég óska honum og fjölskyldu hans, þingmönnum öllum og starfsfólki Alþingis góðs sumars og þess að við hittumst öll heil að loknu sumarhléi.
