Pétur H. Blöndal:
Herra forseti. Íslensk erfðagreining sem er hér til umræðu hefur gert fjölda af vel menntuðu ungu fólki kleift að snúa til landsins og nýta hæfileika sína og menntun í þágu þjóðarinnar. Þetta er mjög jákvætt og sá samningur sem gerður hefur verið um gagnagrunninn eykur enn frekar þessi áhrif. Auk þess mun gagnagrunnurinn og vinnsla á honum stuðla að aukinni þekkingu á sjúkdómum og alls konar krankleikum sem herja á mannkynið. Ef þetta lagar og bætir kjör fólks, sjúklinga um allan heim, tel ég þetta mjög jákvætt. Ég tel jafnjákvætt að gefa upplýsingar um gen mín inn í gagnagrunninn og að gefa blóð. Þessar upplýsingar gagnast einhverjum sjúklingi úti um heim og það mættu þeir hafa í huga sem hafa neitað að gefa upplýsingar inn í gagnagrunninn að þeir eru í rauninni að neita að gefa blóð. Það er einmitt þannig.
Svo er mjög jákvætt að ætlunin er að greiða 70--140 millj. á ári í eins konar auðlindaskatt sem er algert nýmæli og er það hvorki meira né minna en 840--1.680 millj. á þessum tíma. Það eru ekki litlir peningar, það eru um 10% af því sem áætlað var að það mundi kosta að gera grunninn.
Gagnrýni hefur komið fram á einkaverndina, þ.e. að persónuupplýsingar liggi þarna opnar. Ég bendi á að engar nýjar upplýsingar verða til, eingöngu er verið að vinna úr þeim upplýsingum sem liggja þegar fyrir hjá heilsukerfinu --- stórir gagnagrunnar ganga undir kennitölum og nafni.