Iðnaðarráðherra (Valgerður Sverrisdóttir):
Hæstv. forseti. Á þessu ári hafa tíu skip lengri en 15 m verið í smíðum fyrir Íslendinga hér heima. Þrjú þeirra eru þegar tilbúin og sjö eru í smíðum. Eitt þeirra er að fullu smíðað hér heima en það er ferja sem Stálsmiðjan smíðar. Bolir allra hinna skipanna níu eru smíðaðir í Póllandi. En skipin eru að öðru leyti fullsmíðuð hér. Nú eru 19 skip í smíðum fyrir Íslendinga í útlöndum. Flest eru í smíðum í Kína eða 14 talsins, fjögur skip eru í smíðum í Chile og eitt í Póllandi.
Á þessu tímabili, frá 1995--1998, voru tíu skip í smíðum fyrir Íslendinga. Hér innan lands var helmingurinn eða fimm skip smíðaður og jafnmörg skip erlendis. Tvö þeirra voru smíðuð í Noregi, eitt í Litháen, eitt í Hollandi og eitt í Póllandi.
Spurt er, með leyfi forseta:
,,Hefur eða hafði Siglingastofnun Íslands eftirlit með smíði skipa sem spurt er um í 1. og 2. lið, og þá hve mörgum? Fram komi skipting eftir löndum varðandi þau skip sem smíðuð voru erlendis.``
Svarið er: Lítum fyrst á þau skip sem smíðuð hafa verið hér á landi. Siglingastofnun Íslands hefur að öllu leyti haft eftirlit með smíði þeirra fimm skipa sem smíðuð voru innan lands á árunum 1995--1998 og fimm af þeim tíu skipum sem hafa verið í smíði hér á landi á þessu ári. Hin skipin fimm sem verið hafa í smíðum hér á landi á þessu ári hafa lotið eftirliti flokkunarfélaga en öryggisbúnaður verið undir eftirliti Siglingastofnunar Íslands.
Hvað varðar skip sem smíðuð hafa verið í útlöndum þá voru öll skipin sem smíðuð voru árin 1995--1998 undir eftirliti flokkunarfélaga en öryggisbúnaður undir eftirliti Siglingastofnunar Íslands. Skipin sem verið hafa í smíðum í útlöndum á þessu ári hafa einnig verið undir eftirliti flokkunarfélaga en samkvæmt upplýsingum frá Siglingastofnun Íslands sem hefur veitt allar þessar tölulegu upplýsingar liggur ekki fyrir með hvaða hætti skoðun á björgunar- og öryggisbúnaði verður.
Þó hér sé sagt að flokkunarfélag hafi eftirlit með smíði skipa er nauðsynlegt að hafa í huga að Siglingastofnun Íslands fer yfir allar teikningar og tæknilýsingar af skipum til að tryggja að íslenskum reglum sé framfylgt.
Auk þess er um að ræða ýmis atriði sem flokkunarfélög vísa beinlínis til úrskurðar stofnunarinnar enda vinna flokkunarfélög hér í umboði samgrn. Þar með er unnt að fela þeim eftirlit með björgunar- og öryggisbúnaði samkvæmt nánari fyrirmælum stofnunarinnar. Ég lít svo á að ég hafi svarað fyrirspurninni.