[prenta uppsett í dálka] 60. fundur, 125. lþ.
Ögmundur Jónasson:
Herra forseti. Hér er hreyft við mjög mikilvægu máli varðandi endurskoðun skattalöggjafarinnar. Það er áhyggjuefni hver þróunin hefur orðið í þeim efnum á síðustu árum. Eða skyldu menn hafa tekið eftir því að í fjárlögum fyrir þetta ár er gert ráð fyrir því að framlag ríkissjóðs til barnabóta verði 320 millj. kr. lægra en það var á síðasta ári? Þessu veldur að viðmiðunarmörk barnabótanna eru ekki látin fylgja almennri launaþróun í landinu.
Hið sama hefur verið uppi á teningnum varðandi skattleysismörk, ekki aðeins á þessu ári, þar sem gert er ráð fyrir 2,5% hækkun á móti 5% launahækkun heldur hefur þessi þróun gengið eftir undanfarin ár og valdið því að skattbyrðum hefur verið hlaðið á láglaunafólk og millitekjuhópa. Það er kominn tími til að snúið verði af þessari óheillabraut.
