[prenta uppsett í dálka] 61. fundur, 125. lþ.
Viðskiptaráðherra (Valgerður Sverrisdóttir) (andsvar):
Hæstv. forseti. Ég vil í sjálfu sér ekki útiloka neitt í þeim efnum sem hv. þm. talaði um og tel reyndar að það sé nokkuð um það á sérsviðum að hér séu starfandi nokkurs konar úrskurðarnefndir. En allt þarf þetta yfirlegu og ég tel að við eigum ekki að ana að neinu í þessum efnum. Ég býst alveg við að nefndin fjalli um þetta eins og margt annað. Almennt séð held ég að við tökum stórt skref í réttindamálum neytenda með því að lögfesta það frv. sem hér er til umfjöllunar og síðan verði það að sjálfsögðu skoðað í fyllingu tímans hvaða ákvæði það eru sem mætti hugsanlega auka við til þess að bæta enn hag neytenda.
