Ásta Möller (andsvar):
Herra forseti. Í þessum leik er bæði vörn og sókn og það er ekki síst leikni í vörn sem gefur stig.
Í skoðun minni á þessu máli fór ég í gegnum fjölda greina --- ég get afhent hv. þm. afrit af þeim greinum --- þar sem sérstaklega eru skoðuð áhrif áhugamannahnefaleika á heilsu iðkenda. Í hverri greininni á fætur annarri koma fram niðurstöður rannsókna sem benda til þess að áhrif á heilsu séu óveruleg. Hins vegar verður líka að átta sig á því að ef menn vilja vera í skotgröfunum þá komast þeir ekkert áfram. Sú leið sem bandarísku læknasamtökin hafa valið að fara núna, þ.e. að vinna með fólki til að fækka slysum í hnefaleikum tel ég vera farsælli en sú leið að vera í skotgröfum.