[prenta uppsett í dálka] 63. fundur, 125. lþ.
Ögmundur Jónasson (andsvar):
Herra forseti. Það er hárrétt hjá hv. þm., við höfum ólíka afstöðu til Schengen-samkomulagsins. Við byggjum afstöðu okkar á málefnalegum forsendum. Mínar eru þær að ég tel að tilkostnaðurinn við Schengen sé of mikill miðað við þá kosti sem þessu fylgja. Ég tel að með Schengen-samstarfinu muni draga úr fíkniefnaeftirliti, eftirliti í tolli. Jafnframt finnst mér það ekki hugnanleg framtíðarsýn að þurfa að draga erlenda gesti sem koma til Íslands í dilka, annars vegar Evrópusambandsfólkið og hins vegar þá sem koma frá öðrum löndum, hvort sem það er frá Asíu, Bandaríkjunum, Kanada, Vestur-Íslendingana eða aðra. Ég á eftir að sannfærast um að eftirsóknarvert sé fyrir Íslendinga að gerast landamæraverðir fyrir hið nýja evrópska stórríki. Það er framtíðarsýn sem ég felli mig ekki við.
