[prenta uppsett í dálka] 66. fundur, 125. lþ.
Jón Bjarnason (andsvar):
Herra forseti. Ég fagna því að hv. þm. Jón Kristjánsson lýsir því yfir að hann vilji ekki tengja þetta beint saman, eins og mér fannst þó liggja að í ræðu hans, að nauðsynlegt væri að selja ríkiseignir til að ráðast í þessar framkvæmdir. Það hefði verið nöturlegt ef landsbyggðarmenn stæðu frammi fyrir því að þeir yrðu að selja símann til þess að fá veg.
En ég get fallist á það og er sammála honum að sölu ríkiseigna á ekki að verja til reksturs. Henni á þá að verja til uppbyggingar og eflingar annars atvinnulífs eða þjónustu til varanlegs tíma af hálfu ríkisins. Það væri fagnaðarefni ef við gætum fengið söluandvirði bankanna á sl. ári til vegagerðar. Komi fram tillaga um það þá finnst mér það alveg bráðsnjallt.
