Ásta R. Jóhannesdóttir (andsvar):
Herra forseti. Það var ekkert rangt sem hæstv. ráðherra sagði, hann hélt sig við vegáætlun. Aftur á móti minnist hann ekki á að búið er að taka þarna frá í frestun tæplega helminginn af því fé sem ætlað er til framkvæmdanna þannig að verið er að minnka framkvæmdaféð á höfuðborgarsvæðinu á þessum tíma niður í 285 millj. úr 1,1 milljarði. Ég spyr hæstv. ráðherra vegna þess að hann var að væna sveitarstjórnarmenn á höfuðborgarsvæðinu um að þeir væru ekki tilbúnir með framkvæmdir. Þá taldi ég upp áðan í máli mínu ýmsar mjög bráðnauðsynlegar framkvæmdir sem eru tilbúnar. Telur hæstv. ráðherra að þessar 285 millj. kr. dugi eitthvað upp í þær framkvæmdir sem eru nú þegar tilbúnar á höfuðborgarsvæðinu?
Ég fer fram á það, herra forseti, að hann dragi orð sín til baka um það sem hann sagði um sveitarstjórnarmenn sem væru ekki tilbúnir með mál sín hvað varðar framkvæmdir. Það er rangt.