Forsætisráðherra (Davíð Oddsson):
Herra forseti. Ég hef svo sem ekki miklu við að bæta það sem hv. þm. sagði. Ég tek undir með honum að þetta áhugaleysi á notkun fánans í því skyni sem lögin heimila hefur komið okkur á óvart.
Á hinn bóginn vil ég segja frá því að ég tel það út af fyrir sig ekki í mínum verkahring eða ráðuneytisins að auglýsa sérstaklega eftir notendum að fánanum. Mér finnst það ekki við hæfi. Mér finnst að menn verði að bera sig eftir því í samræmi við lögin en ekki að við séum að auglýsa fánann til notkunar. Mér finnst að þá værum við farin að ganga skrefinu lengra en smekklegt gæti talist.