Katrín Fjeldsted:
Herra forseti. Ég vil líka þakka fyrirspyrjanda fyrir að vekja athygli á þessu máli sem er mjög þarft. Eins og síðasti ræðumaður tók fyrir slysasmál sjómanna, þá vil ég í stuttu máli gera að umtalsefni umferðarslys í Reykjavík. Umferðaryfirvöld í Reykjavík hafa árum saman skráð þau slys sem upplýsingar hafa verið aðgengilegar um og myndað á þeim grundvelli svokallaða svartblettaskýrslu sem hefur síðan orðið til að gripið hefur verið til aðgerða, hámarkshraði lækkaður, hraðahindranir settar, götum lokað o.s.frv. Þannig hefur verið gripið til ýmissa slíkra ráða í umferðinni í Reykjavík með góðum árangri. Því er gleðiefni að sjá að með samræmdri slysaskrá yfir landið stefni menn að því á landsvísu. Ég fagna því.