Guðmundur Árni Stefánsson:
Herra forseti. Ég vil vekja á því athygli að ég ruglaði engu saman. Mér er kunnugt um það að annars vegar er um að ræða þjóðlendunefnd, vinnuhóp í ráðuneytinu, og hins vegar svokallaða óbyggðanefnd.
En ber hins vegar svo að skilja að hæstv. landbrh. kunni ekki skil á þessu tvennu? Hann hefur upplýst það ítrekað að um þessi mál hafi verið fjallað í ríkisstjórninni. Hefur þá hæstv. fjmrh. ekki reynst kleift að útskýra þessa hluti, því að hér er haft beint eftir hæstv. landbrh.?
Að vísu finnst mér slæmt að þurfa að ræða þetta í hans fjarveru en ég hafði trú á að hann yrði hér. En hjá því verður ekki komist því að ítrekað eru fjölmiðlar að fjalla um málið á þessum grundvelli. Ég kalla því enn og aftur eftir því hvort hér sé um meira að ræða en tæknilega útfærslu og verklag og vinnubrögð í þessum efnum eða hvort hér sé um það að ræða að stjórnarflokkarnir séu einfaldlega ekki samstiga þegar kemur að stefnumörkun í þessu stóra máli, því að hér er um mjög veigamikið mál að ræða og mikilvægt að vel sé að verki staðið strax á fyrstu skrefunum.