Jón Kristjánsson (andsvar):
Herra forseti. Ég get eiginlega ekki skilið það eftir í þessari umræðu að það hangi á Schengen-samningnum hvort flugvellir á Egilsstöðum og Akureyri verði millilandaflugvellir. Það kemur þessum samningi í raun ekkert við í sjálfu sér. Það eru allt aðrir hlutir sem þar hanga á spýtunni og það er auðvitað fullkunnugt. Keflavíkurflugvöllur er með svona mikla umferð vegna þess að hann er tengiflugvöllur. Það hafa verið gerðar ráðstafanir og miklar tilraunir til að fá umferð í gegnum Egilsstaða- og Akureyrarflugvöll beint frá útlöndum en Schengen-samningurinn breytir engu þar um. Það eru alveg full tök á því að afgreiða farþega af Schengen-svæðinu sem utan frá á þessum völlum eins og ég hef tekið fram. Það er algerlega ástæðulaust að mála þetta þessum litum og algerlega á skjön við umræðuna sem hér fer fram. Hv. þm. geta verið á móti þessum samningi en það verður að varast að blanda saman algerlega óskyldum atriðum.