Ásta Möller:
Virðulegi forseti. Mig langar að blanda mér aðeins í umræðuna varðandi það sem fram kom í máli hv. þm. Jóns Kristjánssonar. Hann ræddi um að þátttaka í Schengen væri ákveðið viðskiptatækifæri. Þegar ég kom að þessu máli fyrst sem fulltrúi í allshn. þá var það fyrsta sem ég heyrði um Schengen að þetta yrðu auknar álögur á ferðaþjónustuna. Þess vegna varð það mér undrunarefni, þegar ég fór síðan á fund ýmissa ferðamálafræðinga á Keflavíkurflugvelli í ferð með allshn. og utanrmn., að fulltrúar Flugleiða litu á aðild að Schengen sem viðskiptatækifæri. Þar er því ekki litið á þetta sem auknar álögur. Þeir litu á samninginn sem viðskiptatækifæri að geta markaðssett Ísland sem hlið að Evrópu. Ég vil biðja fólk um að hugleiða þann þátt málsins. Í stað þess að aðildinni fylgi álögur á ferðaþjónustuna er litið á þetta sem jákvæða þróun til að auka ferðaþjónustu á Íslandi.